Shri Hit Bayalis Leela — chhnd 36

rag dhanashri

rajti Radha nagri, sundarata ki rasi |
nirakhat piy mohe sakhi, sahaj mand mridu hasi |
ho! Rasik rangili Sohni, meri naval chhabili mohni || 1 ||
ang-ang Bhushan bane, sundar neel nichol |
ratan kanak kundal khache, tarlit ruchir kapol || 2 ||
latakti lalit suhavni, bainni gunthit-kes |
mrigmad tilak ju ati lasai, bainda madhya sudes || 3 ||
nain chapal ati sohhin, ujjwal sham surang |
chitvan par varaun sakhi, khanjan meen kurang || 4 ||
alak jalad chabi unai, dasan beeju chamkat |
adhar swati ras barshai, piy chatik na aghat || 5 ||
nasa put besri bani, jhalkat jalaj sarup |
dasan vasan pratibimb ten, sobhit surang anup || 6 ||
chibuk sham bindu sahajhi, nirakhat ati sukh det |
manau madhup man peey kau, vadan-kanj ras let || 7 ||
kanth vrind-Muktavali, sobhit nag Mani lal |
kar valya kati kinkini, Angad bahu mrinal || 8 ||
tribli udar tarangini, nabhi rup-ras ainn |
naval rasik piy ladilau, karat pan din-rainn || 9 ||
jehri payal ati bani, Nupur ati abhiram |
chalat ruchir suni rav par, banshi varat sham || 10 ||
Indu koti nakh sam nahi, kaha lagi kahun bakhan |
sahaj subhagta ang ki, banti na upma aann || 11 ||
charan Charu vivi sohne, chitrit javak rang |
"hit dhruv' nain mein basau, so chabi dinhi abhang || 12 ||

राजति राधा नागरी, सुंदरता की रासि।
निरखत पिय मोहे सखी, सहज मंद मृदु हासि।
हो! रसिक रँगीली सोहनी, मेरी नवल छबीली मोहनी॥१॥
अंग-अंग भूषन बने, सुंदर नील निचोल।
रतन कनक कुंडल खचे, तरलित रुचिर कपोल॥२॥
लटकति ललित सुहावनी, बैंनी गूँथित-केस।
मृगमद तिलक जु अति लसै, बैंदा मध्य सुदेस॥३॥
नैंन चपल अति सोहहीं, उज्ज्वल स्याम सुरंग।
चितवन पर वारौं सखी, खंजन मीन कुरंग॥४॥
अलक जलद छबि ऊनई, दसन बीजु चमकात।
अधर स्वाति रस बरषई, पिय चातिक न अघात॥५॥
नासा पुट बेसरि बनी, झलकत जलज सरूप।
दसन वसन प्रतिबिंब तें, सोभित सुरँग अनूप॥६॥
चिबुक स्याम बिंदु सहजही, निरखत अति सुख देत।
मनौं मधुप मन पीय कौ, वदन-कंज रस लेत॥७॥
कंठ वृंद-मुक्तावली, सोभित नग मनि लाल।
कर वलया कटि किंकिनी, अंगद बाहु मृनाल॥८॥
त्रिबली उदर तरंगिनी, नाभि रूप-रस ऐंन।
नवल रसिक पिय लाड़िलौ, करत पान दिन-रैंन॥९॥
जेहरि पायल अति बनी, नूपुर अति अभिराम।
चलत रुचिर सुनि राव पर, बंशी वारत स्याम॥१०॥
इंदु कोटि नख सम नहीं, कहाँ लगि कहौं बखान।
सहज सुभगता अंग की, बनति न उपमा आँन॥११॥
चरन चारु विवि सोहने, चित्रित जावक रंग।
"हित ध्रुव' नैंननिं में बसौ, सो छबि दिनहि अभंग॥१२॥