Shri Hit Bayalis Leela — chhnd 66

rag Gauri

rasik kunwar dampati chabi seevan, vanseevat ke tir |
khelt kusum gaind kar leeyain, sang sakhinu ki bhir || 1 ||
nirttan karat sudhang kala sab, ang-ang gunni gambheer |
Bhushan-rav suni rahe ratat te, hans, keki, pik, kir || 2 ||
bhay shramit bani rahe swed-kan, komal subhag sareer |
ihi hit kamal tarnija parsain, aavat mand samir || 3 ||
ruchir swed-sourabh jal bheenen, neel-pit tan cheer |
‘hit dhruv’ nirakhi magan bhain sahachri, rahe nain bhari nir || 4 ||

रसिक कुँवर दंपति छबि सीवाँ, वंसीवट के तीर।
खेलत कुसुम गैंद कर लीयैं, संग सखिनु की भीर॥१॥
निर्त्तन करत सुधंग कला सब, अँग-अँग गुननि गँभीर।
भूषन-रव सुनि रहे रटत ते, हंस, केकि, पिक, कीर॥२॥
भये श्रमित बनि रहे स्वेद-कन, कोमल सुभग सरीर।
इहि हित कमल तरनिजा परसैं, आवत मंद समीर॥३॥
रुचिर स्वेद-सौरभ जल भीनें, नील-पीत तन चीर।
‘हित ध्रुव’ निरखि मगन भईं सहचरि, रहे नैंन भरि नीर॥४॥