॥ Shri Hit Chaurasi Ji ॥
shri hit Harivansh mahaprabhu · 84 pad
brajbhasha ke 84 pad — shri Priya-priyatam ke nitya vihar ka ras. Pujya maharaj ji nitya path ki agyaa dete hain.
pad 1
joi-joi pyarau karai soi mohi bhavai,
bhavai mohi joi soi-soi karen pyare |
mokon tau bhavati thaur pyare ke nainnan mein,
pyarau bhayau chahai mere nainnan ke tare ||
mere tan man pran hoon te pritam priy,
apne kotik pran pritam moson hare |
(jai shri) hit Harivansh hans-hansini sanval-gaur,
kahou kaun karai jal-tarangni nyare || 1 ||
जोई-जोई प्यारौ करै सोई मोहि भावै,
भावै मोहि जोई सोई-सोई करैं प्यारे ।
मोकों तौ भावती ठौर प्यारे के नैंनन में,
प्यारौ भयौ चाहै मेरे नैंनन के तारे ॥
मेरे तन मन प्राण हूँ ते प्रीतम प्रिय,
अपने कोटिक प्राण प्रीतम मोसों हारे ।
(जै श्री) हित हरिवंश हंस-हंसिनी साँवल-गौर,
कहौ कौन करै जल-तरंगनि न्यारे ॥1॥pad 2
pyare boli Bhamini aaju neeki jamini |
bhet naveen megh so damini ||
mohan rasik-rairi mai, tasaun ju-
man karai, aisi kaun kamini |
(jai shri) hit Harivansh shravan sunat pyari,
Radhika ravan so mili gaj-gamini || 2 ||
प्यारे बोली भामिनी आजु नीकी जामिनी ।
भेंट नवीन मेघ सों दामिनी ॥
मोहन रसिक-राइरी माई, तासौं जु-
मान करै, ऐसी कौन कामिनी ।
(जै श्री) हित हरिवंश श्रवण सुनत प्यारी,
राधिका रवन सों मिली गज-गामिनी ॥2॥pad 3
prat samay dou ras lampt,
surat-juddha jai-jut ati phool |
shram varij ghanwindu vadan par,
bhushan anghi ang vikul ||
kachu rahyou tilak shithil alkavli,
vadan kamal manou ali bhul |
(jai shri) hit Harivansh Madan-rang rangi rahe,
nain bainn kati shithil dukul || 3 ||
प्रात समय दोऊ रस लंपट,
सुरत-जुद्ध जय-जुत अति फूल ।
श्रम वारिज घनविन्दु वदन पर,
भूषण अंगहि अंग विकूल ॥
कछु रह्यौ तिलक शिथिल अलकावलि,
वदन कमल मानौं अलि भूल ।
(जै श्री) हित हरिवंश मदन-रंग रँगि रहे,
नैंन बैंन कटि शिथिल दुकूल ॥3॥pad 4
aaju tau juvti terau, vadan anand bharyau,
piy ke sangam ke suchat sukh chainn |
alas-valit bol, surang range kapol,
vithkit arun uneende dou nain ||
ruchir tilak-lesh, kirat kusum-kesh,
sir seemant bhushit manou tain na |
karunakar udaar, rakhat kachu na sar,
dasan-vasan lagat jab dainn ||
kahe kaun durat bheeru, palte pritam cheer,
bas kiye Shyam sikhai sat main |
galit ursi mal, sithil kinkini jal,
(jai shri) hit Harivansh lata-grih sainn || 4 ||
आजु तौ जुवति तेरौ, वदन आनन्द भरयौ,
पिय के संगम के सूचत सुख चैंन ।
आलस-वलित बोल, सुरंग रँगे कपोल,
विथकित अरुण उनींदे दोऊ नैंन ॥
रुचिर तिलक-लेश, किरत कुसुम-केश,
सिर सीमंत भूषित मानौं तैं न।
करुणाकर उदार, राखत कछु न सार,
दसन-वसन लागत जब दैंन ॥
काहे कौं दुरत भीरु, पलटे प्रीतम चीर,
बस किये श्याम सिखै सत मैंन।
गलित उरसि माल, सिथिल किंकिनी जाल,
(जै श्री) हित हरिवंश लता-गृह सैंन ॥4॥pad 5
aaju prabhat lata-mandir mein,
sukh barsat ati harshi yugal var |
gaur Shyam abhiram rangabhre,
latki-latki pag dharat avni par ||
kuch-kumkum ranjit malavli,
surat nath Shri Shyam dham dhar |
Priya prem ke ank alankrit,
chitrit chatur-shiromani nijkar ||
dampati ati anurag mudit kal,
gaan karat man harat paraspat |
(jaishri) hit Harivansh prashans-paraayan,
gayan ali sur det madhur tar || 5 ||
आजु प्रभात लता-मंदिर में,
सुख बरसत अति हरषि युगल वर ।
गौर श्याम अभिराम रंगभरे,
लटकि-लटकि पग धरत अवनि पर ॥
कुच-कुमकुम रंजित मालावलि,
सुरत नाथ श्रीश्याम धाम धर ।
प्रिया प्रेम के अंक अलंकृत,
चित्रित चतुर-शिरोमणि निजकर ॥
दम्पति अति अनुराग मुदित कल,
गान करत मन हरत परस्पर ।
(जैश्री) हित हरिवंश प्रशंस-परायण,
गायन अलि सुर देत मधुर तर ॥5॥pad 6
kaun chatur juvti Priya,
jahi milat lal chor hvai rain |
durwat kyaunv durai suni pyare,
rang mein gahile chainn mein nain ||
ur nakh chandra virane
pat, atapte se bain |
(jai shri) hit Harivansh rasik-
radhapti, pramthit main || 6 ||
कौन चतुर जुवती प्रिया,
जाहि मिलत लाल चोर ह्वै रैन ।
दुरवत क्यौंऽव दुरै सुनि प्यारे,
रंग में गहिले चैंन में नैन ॥
उर नख चंद्र विराने
पट, अटपटे से बैन ।
(जै श्री) हित हरिवंश रसिक-
राधापति, प्रमथित मैन ॥6॥pad 7
aaju nikunj manju mein khelt,
naval kishor naveen kishori |
ati anupam anurag paraspat,
suni abhut bhutla par jori ||
vidrum phatik vivid nirmit dhar,
nav karpur parag na thori |
komal kislay sayan supesal,
tapar Shyam nivesit gori ||
mithun has-parihas paraayan,
peek kapol kamal par jhori |
gaur Shyam bhuj kalah manohar,
neevi-bandhan mochat dori ||
hari-ur-mukur viloki apanpau,
vibhram vikal man-jut bhori |
chibuk sucharu praloi prabodhat,
piy-pratibimb janay nihori ||
neti – neti bachnamrit suni-suni,
lalitadik dekht duri chori |
(jai shri) hit Harivansh karat kar dhunan,
pranaykop malavli tori || 7 ||
आजु निकुंज मंजु में खेलत,
नवल किशोर नवीन किशोरी ।
अति अनुपम अनुराग परस्पर,
सुनि अभूत भूतल पर जोरी ॥
विद्रुम फटिक विविध निर्मित धर,
नव कर्पूर पराग न थोरी ।
कोमल किसलय सयन सुपेसल,
तापर श्याम निवेसित गोरी ॥
मिथुन हास-परिहास परायण,
पीक कपोल कमल पर झोरी ।
गौर श्याम भुज कलह मनोहर,
नीवी-बंधन मोचत डोरी ॥
हरि-उर-मुकुर विलोकि अपनपौ,
विभ्रम विकल मान-जुत भोरी ।
चिबुक सुचारु प्रलोइ प्रबोधत,
पिय-प्रतिबिंब जनाय निहोरी ॥
नेति – नेति बचनामृत सुनि-सुनि,
ललितादिक देखत दुरि चोरी ।
(जै श्री) हित हरिवंश करत कर धूनन,
प्रणयकोप मालावलि तोरी ॥7॥pad 8
ati hi arun tere nain nalin ri |
alas jut itrat rangamge,
bhay nishi jagar mashin malin ri ||
shithil palak mein uthat golak gati,
vindhyau mohan mrig sakat chali na ri |
(jai shri) hit Harivansh hans kal gamini,
sambhram det bhramran alin ri || 8 ||
अति ही अरुण तेरे नैंन नलिन री।
आलस जुत इतरात रँगमगे,
भये निशि जागर मषिन मलिन री ॥
शिथिल पलक में उठत गोलक गति,
विंधयौ मोहन मृग सकत चलि न री ।
(जै श्री) हित हरिवंश हंस कल गामिनि,
संभ्रम देत भ्रमरन अलिन री ॥8॥pad 9
bani Shri Radha mohan (ju) ki jori |
indraneelamni Shyam manohar,
satkumbha tanu gori ||
bhaal vishal tilak hari, kamini-
chikur chandra bich rori |
gaj-nayak prabhu chal gayandni-
gati vrishabhan Kisori ||
neel nichol juvti, mohan pat,
pit arun sir khori |
(jai shri) hit Harivansh rasik radhapti,
surat rang mein bori || 9 ||
बनी श्रीराधा मोहन (जू) की जोरी।
इन्द्रनीलमणि श्याम मनोहर,
सातकुम्भ तनु गोरी ॥
भाल विशाल तिलक हरि, कामिनि-
चिकुर चंद्र बिच रोरी ।
गज-नायक प्रभु चाल गयंदनि-
गति वृषभानु किसोरी ॥
नील निचोल जुवति, मोहन पट,
पीत अरुण सिर खोरी ।
(जै श्री) हित हरिवंश रसिक राधापति,
सुरत रंग में बोरी ॥9॥pad 10
aaju nagri-kishor, bhanvti vichitra jor,
kaha kahun ang-ang param madhuri |
karat keli kanth meli, bahudand, gand-gand,
paras, saras raas laas mandli juri ||
shyamsundari bihar, bansuri mridang tar,
madhur Gosh nupuradi kinkini churi |
(jai shri) dekht Harivansh ali, nirttani sudhang chal,
vari fer det pran deh sao duri || 10 ||
आजु नागरी-किशोर, भाँवती विचित्र जोर,
कहा कहौं अंग-अंग परम माधुरी ।
करत केलि कंठ मेलि, बाहुदंड, गंड-गंड,
परस, सरस रास लास मंडली जुरी ॥
श्यामसुन्दरी बिहार, बाँसुरी मृदंग तार,
मधुर घोष नूपुरादि किंकिनी चुरी।
(जै श्री) देखत हरिवंश आलि, निर्त्तनी सुधंग चाल,
वारि फेर देत प्राण देह सौं दुरी ॥10॥pad 11
manjul kal kunj desh, Radha hari vishad vesh,
raka nabh kumud-bandhu shrad jamini |
sanval duti kanak ang, bihrat mili ek sang,
neerad manau neel madhya last damini ||
arun pit nav dukul, anupam anurag mul,
saurabhyut sheet Anil mand gamini |
kislay dal rachit shain, bolat piy chatu bain,
man sahit pratipad pratikul kamini ||
mohan man mathat mar, parsat kuch-neevi-har,
vepathyut neti neti badat Bhamini |
narvahan prabhu sukeli, bahuvidh bhar bharat jheli,
saurat ras rup nadi jagat pavni || 11 ||
मंजुल कल कुंज देश, राधा हरि विशद वेश,
राका नभ कुमुद-बंधु शरद जामिनी ।
साँवल दुति कनक अंग, बिहरत मिलि एक संग,
नीरद मनौ नील मध्य लसत दामिनी ॥
अरुण पीत नव दुकूल, अनुपम अनुराग मूल,
सौरभयुत शीत अनिल मंद गामिनी ।
किसलय दल रचित शैन, बोलत पिय चाटु बैन,
मान सहित प्रतिपद प्रतिकूल कामिनी ॥
मोहन मन मथत मार, परसत कुच-नीवि-हार,
वेपथयुत नेति नेति बदत भामिनी ।
नरवाहन प्रभु सुकेलि, बहुविध भर भरत झेलि,
सौरत रस रूप नदी जगत पावनी ॥11॥pad 12
chalhi radhike sujan, tere hit sukh nidhan,
raas rachyo Shyam tat Kalind-nandini |
nirttat yuvati samuh, rag rang ati kutuh,
bajat rasmul murlika anandini ||
vansheevat nikat jaha, param ramni bhumi tahan,
sakal sukhad malay bahai vayu mandini |
jati eeshad vikas, kanan atisay suvas,
raka nishi shrad mas Vimal chandini ||
narvahan prabhu nihari, lochan bhari Gosh-nari,
nakh-Sikh soundarya kam-dukh-nikandini |
vilashu bhuj greev meli, Bhamini sukh-sindhu jheli,
nav nikunj Shyam keli jagat-vandini || 12 ||
चलहि राधिके सुजान, तेरे हित सुख निधान,
रास रच्यो श्याम तट कलिंद-नन्दिनी ।
निर्त्तत युवती समूह, राग रंग अति कुतूह,
बाजत रसमूल मुरलिका अनन्दिनी ॥
वंशीवट निकट जहाँ, परम रमणि भूमि तहाँ,
सकल सुखद मलय बहै वायु मन्दिनी ।
जाती ईषद विकास, कानन अतिसय सुवास,
राका निशि शरद मास विमल चन्दिनी ॥
नरवाहन प्रभु निहारि, लोचन भरि घोष-नारि,
नख-सिख सौन्दर्य काम-दुख-निकन्दिनी ।
विलसहु भुज ग्रीव मेलि, भामिनी सुख-सिन्धु झेलि,
नव निकुंज श्याम केलि जगत-वन्दिनी ॥12॥pad 13
nanda ke lal haryau man mor |
haun apne motin lar povat,
kankar dari gayau sakhi bhor ||
bank vilokan chal chhabili,
rasik shiromani nanda kishor |
kahi kaise man rahat shravan suni,
saras madhur Murli ki ghor ||
Indu govinda vadan ke karan,
chitvan kaun bhay nain chakor |
(jaishri) hit Harivansh rasik ras juvti,
tu lai mili sakhi pran akor || 13 ||
नन्द के लाल हरयौ मन मोर ।
हौं अपने मोतिन लर पोवत,
काँकर डारि गयौ सखि भोर ॥
बंक विलोकन चाल छबीली,
रसिक शिरोमणि नन्द किसोर ।
कहि कैसे मन रहत श्रवण सुनि,
सरस मधुर मुरली की घोर ॥
इंदु गोविन्द वदन के कारण,
चितवन कौं भये नैंन चकोर ।
(जैश्री) हित हरिवंश रसिक रस जुवती,
तू लै मिलि सखि प्राण अकोर ॥13॥pad 14
adhar arun tere kaise kai duraun |
Ravi shashi shank bhajan kiyau apwas,
adbhut rangan kusum banaun ||
subh kausey kasiv kaustubhamni,
pankaj-sutan lai angnu lupaun |
harshit indu tajat jaise jaldhar,
so bhram dhundhi kaha haun paun ||
ambun dambha kachhu nahi vyapat,
himkar tapai tahi kaise kai bujhaun |
(jai shri) hit Harivansh rasik navrang piy,
bhrikuti bhaunh tere khanjan laraun || 14 ||
अधर अरुण तेरे कैसे कै दुराऊँ ।
रवि शशि शंक भजन कियौ अपवस,
अद्भुत रंगन कुसुम बनाऊँ ॥
सुभ कौसेय कसिव कौस्तुभमणि,
पंकज-सुतन लै अंगनु लुपाऊँ ।
हरषित इन्दु तजत जैसे जलधर,
सो भ्रम ढूँढ़ि कहाँ हौं पाऊँ ॥
अम्बुन दम्भ कछू नहीं व्यापत,
हिमकर तपै ताहि कैसे कै बुझाऊँ ।
(जै श्री) हित हरिवंश रसिक नवरंग पिय,
भृकुटी भौंह तेरे खंजन लराऊँ ॥14॥pad 15
apni baat mosaun kahi ri Bhamini,
aungi maungi rahat garav ki mati |
haun tosaun kahat hari, suniri Radhika pyari,
nishi kau rang kyau na kahat lajati ||
galit kusum baini, suniri sarang-nainni,
chhuti lat achra badat alsati |
adhar nirang rang rachyauri kapolan,
juvti chalat gajagti arujhati ||
rahsi rami chhabeele, rasan vasan dheele,
shithil kasni kanchuki ur rati |
sakhi sao suni shravan, vachan mudit man,
chali Harivansh bhavan musikati || 15 ||
अपनी बात मोसौं कहि री भामिनी,
औंगी मौंगी रहत गरव की माती ।
हौं तोसौं कहत हारी, सुनिरी राधिका प्यारी,
निशि कौ रंग क्यौं न कहत लजाती ॥
गलित कुसुम बैनी, सुनिरी सारंग-नैंनी,
छूटी लट अचरा बदत अलसाती ।
अधर निरंग रँग रच्यौरी कपोलन,
जुवति चलत गजगति अरुझाती ॥
रहसि रमी छबीले, रसन वसन ढीले,
शिथिल कसनि कंचुकी उर राती ।
सखी सौं सुनि श्रवन, वचन मुदित मन,
चली हरिवंश भवन मुसिकाती ॥15॥pad 16
aaju mere kahe chalau mrignainni |
gavat saras juvti mandal mein,
piy sao milain bhalain pikbainni ||
param praveen kok-vidya mein,
abhinay nipun lag-gati laini |
ruprasi suni naval kishori,
pal-pal ghatat chandni raini ||
(jai shri) hit Harivansh chali ati atur,
radharwan surat sukh daini |
rahsi rabhas aalingan chumban,
Madan koti kul bhai kuchaini || 16 ||
आजु मेरे कहे चलौ मृगनैंनी ।
गावत सरस जुवति मंडल में,
पिय सौं मिलैं भलैं पिकबैंनी ॥
परम प्रवीण कोक-विद्या में,
अभिनय निपुन लाग-गति लैनी ।
रूपरासि सुनि नवल किशोरी,
पल-पल घटत चाँदनी रैनी ॥
(जै श्री) हित हरिवंश चली अति आतुर,
राधारवन सुरत सुख दैनी।
रहसि रभस आलिंगन चुम्बन,
मदन कोटि कुल भई कुचैनी ॥16॥pad 17
aaju dekhi brajsundari mohan bani keli |
ans-ans bahu dai, kishor jor rup rasi,
manau tamal arujhi rahi saras kanak beli ||
nav nikunj bhramar gunj, manju Gosh prem punj,
gaan karat mor pikan apne sur so meli |
Madan mudit ang-ang, beech-beech surat rang,
pal-pal Harivansh pivat nain chashak jheli || 17 ||
आजु देखि ब्रजसुन्दरी मोहन बनी केलि ।
अंस-अंस बाहु दै, किशोर जोर रूप रासि,
मनौ तमाल अरुझि रही सरस कनक बेलि ॥
नव निकुंज भ्रमर गुंज, मंजु घोष प्रेम पुंज,
गान करत मोर पिकन अपने सुर सों मेलि ।
मदन मुदित अंग-अंग, बीच-बीच सुरत रंग,
पल-पल हरिवंश पिवत नैंन चषक झेलि ॥17॥pad 18
suni mero bachan chhabili Radha |
tain payau rassindhu agadha ||
tu vrishabhan gop ki beti |
mohanlal rasik hansi bheti ||
jahi biranchi umapti naye |
tapai tain van-phool binaye ||
jo ras neti neti shruti bhakhyau |
takau tain adhar sudharas chakhyau ||
terau rup kahat nahin avai |
(jai shri) hit Harivansh kachuk jas gavai || 18 ||
सुनि मेरौ बचन छबीली राधा ।
तैं पायौ रससिंधु अगाधा ॥
तू वृषभानु गोप की बेटी ।
मोहनलाल रसिक हँसि भेटी ॥
जाहि बिरंचि उमापति नाये ।
तापै तैं वन-फूल बिनाये ॥
जो रस नेति नेति श्रुति भाख्यौ ।
ताकौ तैं अधर सुधारस चाख्यौ ॥
तेरौ रूप कहत नहिं आवै ।
(जै श्री) हित हरिवंश कछुक जस गावै ॥18॥pad 19
khelt raas rasik braj-mandan |
juvtin ans diye bhuj dandan ||
sarad Vimal nabh Chandra virajai |
madhur-madhur Murli kal bajai ||
ati rajat Ghanshyam tamala |
kanchan-beli bani brajbala ||
bajat taal mridang upanga |
gaan mathat man koti ananga ||
bhushan bahut vivid rang sari |
ang sudhang dikhavat nari ||
barsat kusum mudit suryosha |
suniyat divi dundubhi kal ghosha ||
(jaishri) hit Harivansh magan man shyama |
radharwan sakal sukh dhama || 19 ||
खेलत रास रसिक ब्रज-मण्डन।
जुवतिन अंस दिये भुज दण्डन॥
सरद विमल नभ चन्द्र विराजै ।
मधुर-मधुर मुरली कल बाजै॥
अति राजत घनश्याम तमाला।
कंचन-बेलि बनी ब्रजबाला॥
बाजत ताल मृदंग उपंगा।
गान मथत मन कोटि अनंगा॥
भूषण बहुत विविध रंग सारी।
अंग सुधंग दिखावत नारी॥
बरसत कुसुम मुदित सुरयोषा।
सुनियत दिवि दुंदुभि कल घोषा॥
(जैश्री) हित हरिवंश मगन मन श्यामा।
राधारवन सकल सुख धामा ॥19॥pad 20
mohanlal ke rasmati |
vadhu gupat-govat kat mosaun,
pratham neh sakuchati ||
dekhi sambhar pit pat upar,
kaha chunri rati |
tuti lar latkat motin ki,
nakh bidhu ankit chati ||
adhar-bimb khandit mashi mandit,
gand chalat arujhati |
arun nain ghumat alas jut,
kusum galit latpati ||
aaju rahsi mohan sab luti,
vivid apuni thati |
(jai shri) hit Harivansh vachan suni bhamini,
bhavan chali musikati || 20 ||
मोहनलाल के रसमाती ।
वधू गुपत-गोवत कत मोसौं,
प्रथम नेह सकुचाती ॥
देखि सँभार पीत पट ऊपर,
कहाँ चूनरी राती ।
टूटी लर लटकत मोतिन की,
नख बिधु अंकित छाती ॥
अधर-बिंब खंडित मषि मंडित,
गंड चलत अरुझाती ।
अरुण नैंन घूमत आलस जुत,
कुसुम गलित लटपाती ॥
आजु रहसि मोहन सब लूटी,
विविध आपुनी थाती ।
(जै श्री) हित हरिवंश वचन सुनि भामिनि,
भवन चली मुसिकाती ॥20॥pad 21
tere nain karat dou chari |
ati kulkat samat nahi kahun,
mile hain kunjbihari ||
bithuri mang, kusum Giri-Giri parain,
latki rahi lat nyari |
ur nakh-rekh pragat dekhiyat hai,
kaha duravat pyari ||
pari hai peek subhag gandan par,
adhar nirang sukumari |
(jai shri) hit Harivansh rasikni bhamini,
alas ang-ang bhari || 21 ||
तेरे नैंन करत दोऊ चारी ।
अति कुलकात समात नहीं कहुँ,
मिले हैं कुंजबिहारी ॥
बिथुरी माँग, कुसुम गिरि-गिरि परैं,
लटकि रही लट न्यारी ।
उर नख-रेख प्रगट देखियत है,
कहा दुरावत प्यारी ॥
परी है पीक सुभग गंडन पर,
अधर निरंग सुकुमारी ।
(जै श्री) हित हरिवंश रसिकनी भामिनि,
आलस अँग-अँग भारी ॥21॥pad 22
nainnan par varaun kotik khanjan |
chanchal chapal arun aniyare,
agrabhag banyau anjan ||
ruchir manohar vakra bilokan,
surat-samar-dal-ganjan |
(jai shri) hit Harivansh kahat na banain chabi,
sukhasmudra-manranjan || 22 ||
नैंनन पर वारौं कोटिक खंजन ।
चंचल चपल अरुण अनियारे,
अग्रभाग बन्यौ अंजन ॥
रुचिर मनोहर वक्र बिलोकन,
सुरत-समर-दल-गंजन ।
(जै श्री) हित हरिवंश कहत न बनैं छबि,
सुखसमुद्र-मनरंजन ॥22॥pad 23
Radha pyari tere nain salol |
tain nij bhajan kanak tan jovan,
liyau manohar mol ||
adhar nirang alak lat chhuti,
ranjit peek kapol |
tu ras magan bhai nahin janat,
upar pit nichol ||
kuch yug par nakh-rekh pragat manou,
sankar sir sasi tol |
(jai shri) hit Harivansh kahat kachu bhamini,
ati alas so bol || 23 ||
राधा प्यारी तेरे नैंन सलोल ।
तैं निज भजन कनक तन जोवन,
लियौ मनोहर मोल ॥
अधर निरंग अलक लट छूटी,
रंजित पीक कपोल ।
तू रस मगन भई नहिं जानत,
ऊपर पीत निचोल ॥
कुच युग पर नख-रेख प्रगट मानौं,
संकर सिर ससि टोल ।
(जै श्री) हित हरिवंश कहत कछु भामिनि,
अति आलस सों बोल ॥23॥pad 24
aaju gopal raas ras khelt,
pulin kalptar tir ri sajni |
sarad Vimal nabh Chandra virajat,
rochak triwidh samir ri sajni ||
champak bakul malti mukulit,
matt mudit pik kir ri sajni |
desi sudhang rag rang neekau,
braj-juvtin ki bhir ri sajni ||
maghwa mudit nisan bajayau,
vrat chhandyau muni dheer ri sajni |
(jai shri) hit Harivansh magan man shyama,
harat Madan ghan peer ri sajni || 24 ||
आजु गोपाल रास रस खेलत,
पुलिन कल्पतरु तीर री सजनी ।
सरद विमल नभ चन्द्र विराजत,
रोचक त्रिविध समीर री सजनी ॥
चंपक बकुल मालती मुकुलित,
मत्त मुदित पिक कीर री सजनी ।
देसी सुधंग राग रँग नीकौ,
ब्रज-जुवतिन की भीर री सजनी ॥
मघवा मुदित निसान बजायौ,
व्रत छाँड्यौ मुनि धीर री सजनी ।
(जै श्री) हित हरिवंश मगन मन श्यामा,
हरत मदन घन पीर री सजनी ॥24॥pad 25
aaju neeki bani (shri) Radhika nagri |
braj-juvti-jooth mein rup aru chaturai,
shil singaar gun saban ten agri ||
kamal dakshan bhuja, vam bhuj ans sakhi,
gavti saras mili madhur swar rag ri |
sakal vidya vidit rahsi Harivansh hit,
milat nav-kunj var Shyam bada bhag ri || 25 ||
आजु नीकी बनी (श्री) राधिका नागरी ।
ब्रज-जुवति-जूथ में रूप अरु चतुरई,
शील सिंगार गुन सबन तें आगरी ॥
कमल दक्षिण भुजा, वाम भुज अंस सखि,
गावति सरस मिलि मधुर स्वर राग री ।
सकल विद्या विदित रहसि हरिवंश हित,
मिलत नव-कुंज वर श्याम बड़ भाग री ॥25॥pad 26
mohni Madan gopal ki bansuri |
madhuri shravan put, sunat suni radhike !
karat rati raj ke tap kau nasu ri ||
sarad raka rajni, vipin vrinda sajni,
Anil ati mand seetal sahit basu ri |
param pavan pulin, bhring-sevit nalin,
kalptar tir balweer krit rasu ri ||
sakal mandal bhalin, tum ju hari so milin,
bani var banit upma kahun kasu ri |
tum ju kanchan tani, lal markat mani,
ubhay kal hans Harivansh bali dasu ri || 26 ||
मोहनी मदन गोपाल की बाँसुरी ।
माधुरी श्रवन पुट, सुनत सुनि राधिके !
करत रति राज के ताप कौ नासु री ॥
सरद राका रजनि, विपिन वृन्दा सजनि,
अनिल अति मंद सीतल सहित बासु री ।
परम पावन पुलिन, भृंग-सेवित नलिन,
कल्पतरु तीर बलवीर कृत रासु री ॥
सकल मंडल भलीं, तुम जु हरि सों मिलीं,
बनी वर बनित उपमा कहौं कासु री।
तुम जु कंचन तनी, लाल मर्कत मनी,
उभय कल हंस हरिवंश बलि दासु री ॥26॥pad 27
madhuritu Vrindavan anand na thor |
rajat nagri nav kushal kishor ||
juthika jugal rup manjri rasal |
vithkit ali madhu-madhvi gulal ||
champak bakul kul vivid saroj |
ketki medini mad mudit Manoj ||
rochak ruchir bahai triwidh samir |
mukulit noot nadat pik-kir ||
pavan pulin ghan manjul nikunj |
kislay sain rachit sukh-punj ||
manjeer muraj daph Murli mridang |
bajat upang Veena var mukh chang ||
mrigmad malyaj kumkum abeer |
bandan agarsat surangit cheer ||
gavat sundari hari saras dhamar |
pulkit khag-mrig bahat na vari ||
(jai shri) hit Harivansh hans-hansini samaj |
aise hi karau mili jug-jug raj || 27 ||
मधुऋतु वृन्दावन आनन्द न थोर ।
राजत नागरी नव कुशल किशोर ॥
जूथिका जुगल रूप मंजरी रसाल ।
विथकित अलि मधु-माधवी गुलाल ॥
चंपक बकुल कुल विविध सरोज ।
केतकी मेदिनी मद मुदित मनोज ॥
रोचक रुचिर बहै त्रिविध समीर ।
मुकुलित नूत नदत पिक-कीर ॥
पावन पुलिन घन मंजुल निकुंज ।
किसलय सैन रचित सुख-पुंज ॥
मंजीर मुरज डफ मुरली मृदंग ।
बाजत उपंग वीणा वर मुख चंग ॥
मृगमद मलयज कुमकुम अबीर ।
बंदन अगरसत सुरंगित चीर ॥
गावत सुन्दरि हरि सरस धमार ।
पुलकित खग-मृग बहत न वारि ॥
(जै श्री) हित हरिवंश हंस-हंसिनी समाज ।
ऐसे ही करौ मिलि जुग-जुग राज ॥27॥pad 28
Radhe dekhi van ki baat |
ritu basanta anant mukulit, kusum aru phal pat ||
venu dhuni Nandlal boli, suni va kyau arsat |
karat katav vilamba bhamini, vritha ausar jat ||
lal markatamni chhabeelau, tum ju kanchan gat |
bani shrihit Harivansh jori, ubhay gun-gan-mat || 28 ||
राधे देखि वन की बात ।
ऋतु बसन्त अनंत मुकुलित, कुसुम अरु फल पात ॥
वेनु धुनि नंदलाल बोली, सुनि व क्यौं अरसात ।
करत कतव विलम्ब भामिनि, वृथा औसर जात ॥
लाल मर्कतमनि छबीलौ, तुम जु कंचन गात ।
बनी श्रीहित हरिवंश जोरी, उभय गुन-गन-मात ॥28॥pad 29
braj nav taruni-kadamba mukutamni, shyama aaju bani |
nakh-Sikh laun ang-ang madhuri, mohe Shyam dhani ||
yaun rajat kavri gunthit kach, kanak-kanj-vadni |
chikur chandrikan beech ardh bidhu, manou grasit phani ||
saubhag ras sir sravat panari, piy seemanta thani |
bhrikuti kam-kodand nain-sir, kajjal rekh ani ||
taral tilak, tatank gand par, nasa jalaj mani |
dasan kunda, sarsadhar pallav, pritam man samni ||
chibuk madhya ati Charu sahaj sakhi, sanval bindukni |
pritam pran ratan samput kuch, kanchuki kasib tani ||
bhuj-mrinal bal harat balay jut, paras saras sravni |
Shyam sis taru manau midwari, rachi ruchir ravni ||
nabhi gambhir meen mohan man, khelan kaun hridni |
kris kati, prithu nitamba kinkini vrat, kadli-khambh jaghni ||
pad ambuj javak jut bhushan, pritam ur avni |
nav-nav bhaay vilobhi bham ibh, bihrat var karini ||
(jai shri) hit Harivansh prasanshit shyama, kirti vishad ghni |
gavat sravnan sunat sukhakar, vishv durit davni || 29 ||
ब्रज नव तरुणि-कदम्ब मुकुटमणि, श्यामा आजु बनी।
नख-सिख लौं अँग-अंग माधुरी, मोहे श्याम धनी ॥
यौं राजत कवरी गूँथित कच, कनक-कंज-वदनी ।
चिकुर चंद्रिकन बीच अर्ध बिधु, मानौं ग्रसित फनी ॥
सौभग रस सिर स्रवत पनारी, पिय सीमन्त ठनी ।
भृकुटि काम-कोदंड नैंन-सर, कज्जल रेख अनी ॥
तरल तिलक, ताटंक गंड पर, नासा जलज मनी ।
दसन कुन्द, सरसाधर पल्लव, प्रीतम मन समनी ॥
चिबुक मध्य अति चारु सहज सखि, साँवल बिंदुकनी ।
प्रीतम प्राण रतन संपुट कुच, कंचुकि कसिब तनी ॥
भुज-मृनाल बल हरत बलय जुत, परस सरस स्रवनी ।
श्याम सीस तरु मनौ मिडवारी, रची रुचिर रवनी ॥
नाभि गंभीर मीन मोहन मन, खेलन कौं हृदनी ।
कृस कटि, पृथु नितम्ब किंकिनि व्रत, कदलि-खंभ जघनी ॥
पद अम्बुज जावक जुत भूषण, प्रीतम उर अवनी ।
नव-नव भाय विलोभि भाम इभ, बिहरत वर करिनी ॥
(जै श्री) हित हरिवंश प्रसंशित श्यामा, कीरति विशद घनी ।
गावत स्रवनन सुनत सुखाकर, विश्व दुरित दवनी ॥29॥pad 30
dekht navnikunj suni sajni, lagat hai ati Charu |
madhwika ketki lata lai, rachyau Madan agaru ||
sarad mas, raka nishi seetal, mand-sugandha-samir |
parimal lubdha madhubrat vithkit, nadat kokila-kir ||
bahuvidhi rang mridul kislay dal, nirmit piy sakhi sej |
bhajan kanak vivid madhupurit, dhare dharni par hej ||
tapar kushal kishor-kishori, karat has-parihas |
pritam pani uraj var parsat, Priya duravat vas ||
kamini kutila bhrikuti avlokat, din pratipad pratikul |
atur ati anurag vivas hari, dhai dharat bhuj-mul ||
nagar neebi bandhan mochat, ainchat neel nichol |
vadhu kapt hath kop kahat kal, neti neti madhubol ||
parirambhan viprit rati vitrat, saras surat nijukeli |
indraneel manimay taru manou, last kanak ki beli ||
ratiran mithun lalat patal par, shramjal-siker sang |
lalitadik anchal jhakjhorat, man anurag abhang ||
(jai shri) hit Harivansh yathmati barnat, Krishna rasamrit sar |
sravan sunat prapak rati Radha, pad-ambuj sukumar || 30 ||
देखत नवनिकुंज सुनि सजनी, लागत है अति चारु ।
माधविका केतकी लता लै, रच्यौ मदन आगारु ॥
सरद मास, राका निशि सीतल, मंद-सुगन्ध-समीर ।
परिमल लुब्ध मधुब्रत विथकित, नदत कोकिला-कीर ॥
बहुविधि रंग मृदुल किसलय दल, निर्मित पिय सखि सेज ।
भाजन कनक विविध मधुपूरित, धरे धरनि पर हेज ॥
तापर कुशल किशोर-किशोरी, करत हास-परिहास ।
प्रीतम पानि उरज वर परसत, प्रिया दुरावत वास ॥
कामिनि कुटिल भृकुटि अवलोकत, दिन प्रतिपद प्रतिकूल ।
आतुर अति अनुराग विवस हरि, धाइ धरत भुज-मूल ॥
नागर नीबी बन्धन मोचत, ऐंचत नील निचोल ।
वधू कपट हठ कोप कहत कल, नेति नेति मधुबोल ॥
परिरम्भन विपरित रति वितरत, सरस सुरत निजुकेलि ।
इन्द्रनील मनिमय तरु मानौं, लसत कनक की बेलि ॥
रतिरण मिथुन ललाट पटल पर, श्रमजल-सीकर संग ।
ललितादिक अंचल झकझोरत, मन अनुराग अभंग ॥
(जै श्री) हित हरिवंश यथामति बरनत, कृष्ण रसामृत सार ।
स्रवन सुनत प्रापक रति राधा, पद-अम्बुज सुकुमार ॥30॥