Shri Hit Chaurasi Ji — pad 35

jhulat dou naval kishor |
rajni-janit rang sukh suchat, ang-ang uthi bhor ||
ati anurag bhare mili gavat, sur mandar kal ghor |
beech-beech pritam chit chorat, Priya nain ki kor ||
abla ati sukumar darat man, var hindor jhakor |
pulki-pulki pritam ur lagat, dai nav uraj ankor ||
arujhi Vimal mal kankan sao, kundal sao kach dor |
vepath jut kyau banain vivechit, anand badhyau na thor ||
nirakhi nirakhi phulat lalitadik, vivi mukh Chandra chakor |
dai asees Harivansh prasansat, kari anchal ki chor || 35 ||

झूलत दोऊ नवल किशोर ।
रजनी-जनित रंग सुख सूचत, अंग-अंग उठि भोर ॥
अति अनुराग भरे मिलि गावत, सुर मंदर कल घोर ।
बीच-बीच प्रीतम चित चोरत, प्रिया नैंन की कोर ॥
अबला अति सुकुमार डरत मन, वर हिंडोर झकोर ।
पुलकि-पुलकि प्रीतम उर लागत, दै नव उरज अँकोर ॥
अरुझी विमल माल कंकन सौं, कुंडल सौं कच डोर ।
वेपथ जुत क्यौं बनैं विवेचित, आनँद बढ्यौ न थोर ॥
निरखि निरखि फूलत ललितादिक, विवि मुख चन्द्र चकोर ।
दै असीस हरिवंश प्रसंसत, करि अंचल की छोर ॥35॥