Shri Hit Chaurasi Ji — pad 67

ruchir rajat vadhu kanan kishori |
saras shodas kiye tilak mrigmad diye,
mrigaj lochan ubti ang shir khori ||
gand pandeer mandit chikur Chandrika,
medini kavri gunthit surang dori |
shravan tatank kai chibuk par bindu dai,
kasumbhi kanchuki dure uraj phal kori ||
balay kankan dot, nakhan javak jot,
udar gun rekh, pat neel, kati thori |
subhag jaghan sthal, kunit kinkini bhali,
kok sangit ras-sindhu jhakjhori ||
vivid leela rachit, rahsi Harivansh hit,
rasik sirmaur Radha-ravan jori |
bhrikuti nirjit Madan, mand sasmit vadan,
kiye ras vivash Ghanshyam piy gori || 67 ||

रुचिर राजत वधू कानन किशोरी ।
सरस षोडस किये तिलक मृगमद दिये,
मृगज लोचन उबटि अंग शिर खोरी ॥
गंड पंडीर मंडित चिकुर चंद्रिका,
मेदिनी कवरि गूँथित सुरँग डोरी ।
श्रवन ताटंक कै चिबुक पर बिंदु दै,
कसूँभी कंचुकि दुरे उरज फल कोरी ॥
बलय कंकन दोत, नखन जावक जोत,
उदर गुन रेख, पट नील, कटि थोरी ।
सुभग जघन स्थली, कुनित किंकिनि भली,
कोक संगीत रस-सिंधु झकझोरी ॥
विविध लीला रचित, रहसि हरिवंश हित,
रसिक सिरमौर राधा-रवन जोरी।
भृकुटि निर्जित मदन, मंद सस्मित वदन,
किये रस विवश घनश्याम पिय गोरी ॥67॥