aho chali dekhau ri rasikan nain lal rangeelau vyas kau | aho tan man anand dainn, lal rangeelau vyas kau || sar rup ke rup kau, yah ras ke ras kau sar | dampati hiy sukh-sar koi yah adbhut pragatyau pyar || lal0 || mo ankhiyan ki aankh yah, hiy ke hiy kau sar | tan man kotin pran bali, jake denun naam pai war || lal0 || neh salil drig dahadhe, jake barsat pyari-peey | rom-rom amrit jharai, mero sahaj jibavain jeey || lal0 || gori ki sab gaurta, aru Shyam Shyamta sar | doun hiye ke het kau, nidhi pragti mere laar || lal0 || pyari kau ju suhag piy, pyari piy kau bhag | duhunn bhag kau bhag mere, jagmag sis suhag || lal0 || chhinu-chhinu mein ras sidhu ko, lahrinu umdat raz | dampati jeey jivabni, sudhasar sab ang || lal0 || dekht hi dekht drigan, lagat aur hi aur | ulhat chavi sao chavi nai, lalit manohar gaur || lal0 || koti vishv ki madhuri, maha sar kau sar | sar—sar mein nit nayau, nain na pavain par || lal0 || dekht an dekho lage, herat hiyau hirap | madhu madak murli madhur, jhalkan mati bauray || lal0 || mriduta pag chumat darai, chavi durhi sao bali jay | saras sudeeth sneh kau, parsat jeey daray || lal0 || sundarta sab vishv ki, kari koti guni anuman | nahin jog nichhavar rom kau, kaham tuchch ju mere pran || lal0 || mo man mohai sis suthi, arun jaraksi paag | paryau pech mein pech man, piy pyari anurag || lal0 || kushchit komal kutila lat, ruchir manohar Shyam | ali kul vyakul hvai chalyau, pad -pankaj taki thaam || lal0 || unnat bhaal vishal par, sohat tilak lalam | ta madhi naam ju Radhika, sevat bendi Shyam || lal0 || lalit bhaunh sohai bani, patraavli surang | manhun kam kaman dhing, kusuman kau ju nishang || lal0 || arun Shyam sit chakhan pai, piyaun ju pani war | hit piy-pyari sahaj hi, mile rahat ati pyar || lal0 || jaldhi saras umde rahayn, karuna tunga taranga | jaldhar laun barsain sada, gaur Shyam vivi rang || lal0 || in nennan sao hoy jab, jin nenan kau meli | tab sujhai vrinda vipin, kunj madhuri keli || lal0 || ekmek hvai kai rahau, in nainnan mo nain | (shri) Vrindavan hit madhuri, avlokaun din rainn || lal0 || vilag jo in te hvai rahayn, te ankhiyan jari jaany | vastu na dekhain andhri, nit bhav-peer pirany || lal0 || varon ruchir kapol par, koti arsi manju | ati adbhut jhalkat jaha, neel-pit vivi kanju || lal0 || alak lade hit ladile, duhun dis liye uchhang | Priya dahni, vam piy, chabi barsat ang ang || lal0 || gaur-Shyam chabi sindhu duhun, ati agadh lahrahin | pratibimbit mili paraspat, hit ang-angni mahin || lal0 || kai rajain hit god yah, kai hit hiyre mahin | hit drig hit ki deeth binu, dekhi sakai koi nahin || lal0 || besar mein, moti nachain, so kaisai thahrany | vivi vidhu mukh chabi rang range, lalki-lalki lubhiyany || lal0 || arun adhar ki jyoti mili, ujwal hansi suhat | vivi mukh kamlan pai chhai, Ravi kirnen janu prat || lal0 || Charu ans grova lalit, gaur Shyam tahan vahi | neel pit kamlan mai, mala pahiri ahi || lal0 || bhuj visal ju mrinal jug, sohat lalit lalam | jin bich phule kamal dway, gaur Shyam abhiram || lal0 || bali-bali hit ke hriday ki, prem payodhin apaar | bhitar bahar last jaha, hit jori sukumar || lal0 || tribhuvan mein upma jitau, lautat ulte paany | param sukshm kati-bhag laun, koi pahunchat naany || lal0 || priyu nitamb rambha jaghan, pad-ambuj gaj chal | koti Madan man Mohini, vais kishor rasal || lal0 || pyari piy anuhar sab, rup rang ang ang | umdat romni rom mein, piy pyari kau rang || lal0 || shri hit-sindhu athah hai, piy pyari ju taranga | romni rom jhare parain, umangi yugal ik sang || lal0 || ati ju sukshma romavli, upma kyon kahi jay | janu nij hit ki sukshta, pragat viraji ay || lal0 || nakh-Sikh laun yah madhuri, ramau ju mo drig mahin | ya chabi sao bilgaikai, mo drig anat na jahin || lal0 || in nainnan nainna milau, hiy mein hiy rahau bhoi | bhitar bahar ek ras, hit gaur-Shyam tahan doi || lal0 || tab laun jeevan jin ganau, beetat kal vrithahin | hit charnan ki saran mein, jab lagi aavat nahin || lal0 || hag sohai dekhon sada, liye god dou lal | kai hit drig hit hriday mein, dekhaun keli rasal || lal0 || jiyaun tau aise hi jiyaun, dekht nimish visari | maraun tau ya chavi pai maraun, pran nichhavar vari || lal0 || baras-gaanth reekshan yahi, janchon god pasar | bhori hit bali baksiyau, hit rijhbar udaar || lal0 ||
अहो चलि देखौ री रसिकन नैंन लाल रँगीलौ व्यास कौ। अहो तन मन आनन्द दैंन, लाल रँगीलौ व्यास कौ॥ सार रूप के रूप कौ, यह रस के रस कौ सार। दम्पति हिय सुख-सार कोई यह अद्भुत प्रगट्यौ प्यार॥लाल०॥ मो अँखियन की आँख यह, हिय के हिय कौ सार। तन मन कोटिन प्राण बलि, जाके देंउँ नाम पै वार॥लाल०॥ नेह सलिल दृग डहडहे, जाके बरसत प्यारी-पीय। रोम-रोम अमृत झरै, मेरौ सहज जिबावैं जीय॥लाल०॥ गोरी की सब गौरता, अरु श्याम श्यामता सार। दोउन हिये के हेत कौ, निधि प्रगटी मेरे लार॥लाल०॥ प्यारी कौ जु सुहाग पिय, प्यारी पिय कौ भाग। दुहुँन भाग कौ भाग मेरे, जगमग सीस सुहाग॥लाल०॥ छिनु-छिनु में रस सिधु को, लहरिनु उमड़त रज़। दम्पति जीय जिवाबनी, सुधासार सब अङ्ग॥लाल०॥ देखत ही देखत दृगन, लगत और ही और। उलहत छवि सौं छवि नई, ललित मनोहर गौर॥ लाल०॥ कोटि विश्व की माधुरी, महा सार कौ सार। सार—सार में नित नयौ, नैंन न पावैं पार॥लाल०॥ देखत अन देखो लगे, हेरत हियौ हिराप। मधु मादक मूरलि मधुर, झलकन मति बौराय॥लाल०॥ मृदुता पग चूमत डरै, छवि दूरहि सौं बलि जाय। सरस सुदीठ सनेह कौ, परसत जीय डराय॥लाल०॥ सुन्दरता सब विश्व की, करि कोटि गुनी अनुमान। नहिं जोग निछावर रोम कौ, कहँ तुच्छ जु मेरे प्रान॥लाल०॥ मो मन मोहै सीस सुठि, अरुण जरकसी पाग। पर्यौ पेच में पेच मन, पिय प्यारी अनुराग॥लाल०॥ कुश्चित कोमल कुटिल लट, रुचिर मनोहर श्याम। अलि कुल व्याकुल ह्वै चल्यौ, पद -पंकज तकि ठाम॥लाल०॥ उन्नत भाल विशाल पर, सोहत तिलक ललाम। ता मधि नाम जु राधिका, सेवत बेंदी श्याम॥लाल०॥ ललित भौंह सोहै बनी, पत्रावली सुरंग। मानहुँ काम कमान ढिंग, कुसुमन कौ जु निषंग॥लाल०॥ अरुण श्याम सित चखन पै, पियौं जु पानी वार। हित पिय-प्यारी सहज ही, मिले रहत अति प्यार॥लाल०॥ जलधि सरस उमड़े रहैं, करुणा तुङ्ग तरङ्ग। जलधर लौं बरसैं सदा, गौर श्याम विवि रङ्ग॥लाल०॥ इन नेंनन सौं होय जब, जिन नेनन कौ मेलि। तब सूझै वृन्दा विपिन, कुंज माधुरी केलि॥लाल०॥ एकमेक ह्वै कै रहौ, इन नैंनन मो नैंन। (श्री) वृन्दावन हित माधुरी, अवलोकौं दिन रैंन॥लाल०॥ विलग जो इन ते ह्वै रहैं, ते अँखियाँ जरि जाँय। वस्तु न देखैं आँधरी, नित भव-पीर पिराँय॥लाल०॥ वारों रुचिर कपोल पर, कोटि आरसी मंजु। अति अद्भुत झलकत जहाँ, नील-पीत विवि कंजु॥लाल०॥ अलक लड़े हित लाड़िले, दुहुँ दिस लिये उछंग। प्रिया दाहिनी, वाम पिय, छबि बरसत अँग अंग॥लाल०॥ गौर-श्याम छबि सिंधु दुहुँ, अति अगाध लहराहिं। प्रतिबिंबित मिलि परस्पर, हित अँग-अंगनि माहिं॥लाल०॥ कै राजैं हित गोद यह, कै हित हियरे माहिं। हित दृग हित की दीठ बिनु, देखि सकै कोऊ नाहिं॥लाल०॥ बेसर में, मोती नचैं, सो कैसै ठहराँय। विवि विधु मुख छबि रँग रँगे, ललकि-ललकि लुभियाँय॥लाल०॥ अरुण अधर की ज्योति मिलि, उज्वल हाँसि सुहात। विवि मुख कमलन पै छई, रवि किरणें जनु प्रात॥लाल०॥ चारु अंस ग्रोवा ललित, गौर श्याम तहाँ वाहि। नील पीत कमलन मई, माला पहिरी आहि॥लाल०॥ भुज विसाल जु मृणाल जुग, सोहत ललित ललाम। जिन बिच फूले कमल द्वय, गौर श्याम अभिराम॥लाल०॥ बलि-बलि हित के हृदय की, प्रेम पयोधिं अपार। भीतर बाहर लसत जहाँ, हित जोरी सुकुमार॥लाल०॥ त्रिभुवन में उपमा जितौ, लौटत उलटे पाँय। परम सूक्ष्म कटि-भाग लौं, कोऊ पहुँचत नाँय॥लाल०॥ पृयु नितंब रंभा जघन, पद-अम्बुज गज चाल। कोटि मदन मन मोहिनी, वैस किशोर रसाल॥लाल०॥ प्यारी पिय अनुहार सब, रूप रङ्ग अँग अङ्ग। उमड़त रोमनि रोम में, पिय प्यारी कौ रङ्ग॥लाल०॥ श्री हित-सिंधु अथाह है, पिय प्यारी जु तरङ्ग। रोमनि रोम झरे परैं, उमँगि युगल इक सङ्ग॥लाल०॥ अति जु सुक्ष्म रोमावली, उपमा क्यों कहि जाय। जनु निज हित की सूक्ष्मता, प्रगट विराजी आय॥लाल०॥ नख-सिख लौं यह माधुरी, रमौ जु मो दृग माहिं। या छबि सौं बिलगाइकै, मो दृग अनत न जाहिं॥लाल०॥ इन नैंनन नैंना मिलौ, हिय में हिय रहौ भोइ। भीतर बाहर एक रस, हित गौर-श्याम तहाँ दोइ॥लाल०॥ तब लौं जीवन जिन गनौ, बीतत काल वृथाहिं। हित चरनन की सरन में, जब लगि आवत नाहिं॥लाल०॥ हग सोहै देखों सदा, लिये गोद दोऊ लाल। कै हित दृग हित हृदय में, देखौं केलि रसाल॥लाल०॥ जियौं तौ ऐसे ही जियौं, देखत निमिष विसारि। मरौं तौ या छवि पै मरौं, प्राण निछावर वारि॥लाल०॥ बरस-गाँठ रीक्षन यही, जाँचों गोद पसार। भोरी हित बलि बकसियौ, हित रिझबार उदार॥लाल०॥