brahmcharya ke liye bhojan ke niyam

aap bhojan keval utna hi len jo bina aushadhi ke aapki anten pcha sake aur kabz na ho. Yadi aap jihwa ke swad ke vashbhut hokar adhik matra mein bhojan grahan karte hain, aur aapki anton mein pachne ki samarth nahi hai kyonki aap paryapt shareerik kriya nahi karte, to isse beemariyan ho sakti hain. Yadi aap aath-das ghante niyamit shareerik gatividhi karen, to bhojan pach jaega. Lekin bina niyamit shareerik gatividhi ke garishtha padaarth (zyada mirch, masala, tali cheezen) grahan karne se aapki dincharya prabhavit hogi aur man udas rahega. Kabz hone par rozana ki gatividhiyon mein ruchi nahi rahti, aur alasya ki sthiti bani rahti hai.

sharir par kabz ke prabhav

yadi aapne kabza ka samadhan nahi kiya, to aap bimar ho sakte hain. Anton ko mal se mukt hone ki avshyakta hoti hai. Anytha, itni garmi utpann hogi ki aapki guda mein rog ho sakta hai. Isse gas, esiditi aur anya kai pareshaniyan utpann ho sakti hain. Yadi pet saaf nahi hua aur aap bhojan karte chale ja rahe hain, to anton mein itni jalan aur tap utpann hoga ki mal plastik ki tarah kada ho jaega, jo rogon ka karan banega. Kabza se mukt hona hai to pratkal uthkar sabse pehle garm pani piyen. Jitna aapki kshamta ho – aadha liter, paun liter, ek liter, ya sava liter – utna pani piyen. Vajrasan mein baithkar aram se dhire-dhire pani piyen, aur phir thoda tahal len.

jab aapka pet saaf rahega, to aap prasann mudra mein apna jeevan ji sakte hain aur bhajan bhi kar sakte hain. Agar aapke jeevan mein kathin shareerik parishram nahi hai to aapki anton mein garishtha bhojan (jaise ki samosa ya halwa) pachne ki kshamta nahi hai; ye un logon ke liye hain jo kadi mehnat karte hain, jaise kisan ya kathin shareerik parishram mein lage hue log.

aapko to bas pran poshan ke liye sada bhojan ( jaise ki moong ki daal, ghiya ki sabji aur do rotiyan) hi chahiye. Khane ke baad yadi aapko lage ki aap abhi do rotiyan aur kha sakte hain, to wahin ruk jain, kyonki hamen bhojan mein pani bhi shamil karna hai aur pet mein vayu ke liye bhi thodi jagah khali rakhni hai. Pet ko puri tarah bharne ki avshyakta nahi hai. Yadi aap aisa nahi karte, to phir aapko vaidya ke paas jana padega, aur aapko kabz, pet mein garmi, ya dhatu rog jaisi shikayten hongi.

kabz aur brahmcharya ke beech sambandh

yadi kabz rahega, to swabhavic rup se veeryapat ho sakta hai. Anuchit aacharan (hastmaithun aadi) karne se nasen aur nadiyan itni kamzor ho jaengi ki bina kisi prayas ke veeryapat ho sakta hai. Man ki vivid vrityio ko niyantrit karne ke liye pehle hamen sharir ko svasth rakhna avashyak hai. Svasth rahne ka arth charbi badhana nahi hai, balki santulit ahar lena hai. Halka bhojan karen; bhojan kam ho, parantu paryapt ho. Yah hamari adhyatmik shakti ko badhata hai, jabki adhik bhojan, bhale hi satvic ho, anttat tamogun utpann kar sakta hai.

ovraeeting ki aadat – zaroorat se zyada khana

doodh satvic hota hai aur thodi matra mein yah satogun ko prakt karta hai, parantu adhik matra mein lene se yahi satogun tamogun mein parivartit ho sakta hai, jisse pramad (procrastination) ki sthiti utpann hoti hai.

kyon man ke chakkar mein phans rahe ho? Sanyam se chalo. Yadi pet saaf nahi hai, to bhojan mat lo. Salad khakar kam chala lo. Isse apne aap pet saaf ho jaega, aur subah uthte se hi garm pani piyo, aap puri tarah khali aur halka mehsus karoge. Ek din aisa karke dekh lo, char rotiyon mein aapka kam chal jaega. Agar subah-subah bhojan ki avshyakta nahi hai, use mat lo. Pet saaf ho nahi raha, aur aap din mein teen-char bar khate chale ja rahe hain, isse to aapki anton mein mal ki parten jam jaengi aur sharir phulta jaega. Sharir ko halka aur svasth rakhna bahut avashyak hai, varna rojmarra ke kam bhi pure nahi honge, aur bhajan karne ka to sawal hi nahi uthta.

maindphul eeting – sehat ke liye phaydemand

pran poshan ke liye 24 ghante mein char-paanch roti aur sabji paryapt hai. Santo ne to kai-kai dino tak bina bhojan ke bhajan mein leen hokar jeevan bitaya hai. Adhik swadisht padaarth aapka brahmcharya banae nahi rakh sakte. Adhik swadisht bhojan se anten kamzor ho jaengi aur pachan sambhav nahi hoga. Agar aap aath-das ghante ki kadi shareerik mehnat kar rahe hain, jaise fawda chalana, hal jotna, ya daud-bhag karna, to sharir adhik bhojan pcha lega. Lekin jab aapke paas aisi sevaen nahi hain, aur aap keval jihwa ki tripti ke liye khate jaate hain, to yah aapke liye pareshani ka karan banega.

jaise bhojan avashyak hai, waise hi jal aur vayu bhi avashyak hain. Aap murkhatavash is sharir rupi gaadi ko nasht kar rahe hain aur apni yatra ko badhit kar rahe hain. Bhojan ka ek siddhant hai: pet ka ek hissa ann, ek hissa pani, aur aadha hissa vayu ke liye khali rakhen. Aisa karne par aap dekhenge ki aapki urja shakti badhegi aur bhajan ki ruchi bhi bani rahegi. Lekin jab pet mein charon hisse mein keval ann bhar jaata hai, aur upar se pani pine ki ruchi nahi rahti, to aapke andar vishaile padaarth utpann honge. Jal jab sharir mein jaata hai, to laghu shanka ke madhyam se hanikarak tattvo ko bahar nikalta hai aur anton mein jakar mal ko gila karke malashay se bahar niklne mein sahayata karta hai.

jeevan ka lakshya kya hai?

aapka jeevan svasth hona chahiye. Agar achanak koi asadhya rog aata hai, to bhagwan samarth dete hain, lekin yadi aap khud apna nash kar rahe hain, to yah aapki galti hai. Adhik bhojan karne wala vyakti kabhi bhajan mein ruchi nahi le sakta. Sukshm bhojan karne wala vyakti hi bhajan mein sthir rah sakta hai. Agar aapke pet mein kabz hai, to do din ka upvas karen aur keval pani piyen. Isse pet apne aap saaf ho jaega. Lekin yadi aap swadisht bhojan adhik matra mein khate rahenge, to kya aap sochte hain ki bhajan mein ruchi jagegi ya aapka brahmcharya sthir rahega? Kya keval jihwa ki tripti hi hamare jeevan ka uddeshya hai? Kab tak khate rahenge? Sharir ko kab tak posit karte rahenge? Yah ek din nasht hoga. Jis karya ke liye is duniya mein aae hain, us uddeshya ko pura kijiye.

brahmcharya: purani galat adte aur parinaam

yadi aap galat kriyaen, jaise hastmaithun ya galat sambandh, nahi kar rahe hain aur aapka pet saaf hai, to brahmcharya swabhavic rup se nasht nahi hota. Agar kisi ka virya har aath-das din mein swatah nikalta hai, to yah varsho se niyamit rup se urja ka apavyay karne ka parinaam hai. Agar aap apni jannendriy (penis) ko nahi chhedte hain, to dhire-dhire iska niyantran banne lagega, aur ek din aap brahmcharya mein sthir ho sakte hain. Yadi aap galat ahar ya vicharon mein lage rahte hain, to hi virya ka swatah pravah ho jaega—yah aapki galtyon ka parinaam hai.

mahabharat mein Bhishma ji batte hain ki sharir mein ek ‘manovah nadi’ hoti hai. Jab ise tap nahi pahunchta, to veeryapat sambhav nahi hota. Is tap ki do mukhya prakriyaen hain: pahla, galat chintan (yaun vicharon mein lipt rahna), aur dusra, galat kriya (hastmaithun ya anya galat sambandh). Yadi aapne kamasakta hokar chintan kiya, to yah kamagni manovah nadi ko garam kar degi aur aapke virya ka nash kar degi.

aapki dincharya aur khanpan puri tarah sanyamit hona chahiye. Yadi aap gandi filmein dekhte hain aur hastmaithun jaisi anuchit harakten karte hain, to duniya mein koi vaidya nahi hai jo aapko brahmachari bana sake. Aaj chhote-chhote bachchhe bhi dhatu rog, kamar dard aur ankhon ki kamzor drishti jaisi samasyaon se grast ho rahe hain, aur iske piche karan ham swayam hain. Is vishay par na koi charcha karna chahta hai, na kuch sunna chahta hai—bas pashuv aacharan ke liye chhut mil jae, yahi apeksha hai.

savdhaan rahie, yah jeevan koi khilwad nahi hai. Chahe aap grihasth hon ya sadhak, brahmcharya ka palan aniwarya hai. Yah aapko ek accha grihasth banaega aur ek sacha upasak banne mein madad karega. Yadi aap ise yun hi ksheen karte rahenge, to bhavishya mein aap kisi karya ke layak nahi rah jaenge. Kuch samay baad aapke sharir mein vibhinn prakaar ki peedaen hone lagegi, aapke chintan ki shakti kamzor ho jaegi, aapki smaran shakti ksheen hone lagegi, aur anttat aap avsad (Depression) ka shikar ho jaenge.

jine ke liye khao, khane ke liye mat jio

bhojan ka uddeshya keval pran poshan hai, na ki swad ki tripti. Hamen indriyon ke vishyon mein nahi phansna chahiye. Kuch din is tarah ka jeevan jeekar dekhiye. Yah bhi nahi ki ham hathpurwak bahut kam bhojan karen. Uchit aur santulit bhojan karen. Yadi kamzori mehsus ho to doodh aur phalan ka sevan kar sakte hain, lekin yadi avshyakta nahi hai to rahne den. Yadi hamara ek bar bhojan karne se kam chal jaata hai, to din mein teen bar khane ki avshyakta nahi hai.

nishkarsh

agar aap abhi savdhaan nahi hue, to age chalkar aapka sharir aur kamzor hoga, sthiti ke anusaar aur bhi rog aa sakte hain, phir aap kya karenge? Pet badhta chala ja raha hai, sharir mein charbi badh rahi hai, uthne-jhukne mein pareshani ho rahi hai, aise mein aap apne kartavya ka palan aur bhajan kaise karenge? Abhi yadi aap theek se ahar len, to aapka sharir apne aap sahi ho jaega, aapko kisi davakhane ki zaroorat nahi padegi. Aapka tap badhega, pavitra badhegi, tej badhega aur bhajan mein bhi vridhi hogi. Alphar karen, aap shant aur prasann rahenge. Pet saaf ho, sharir svasth ho, aur man buddhi satogun mein sthit ho, to anand milega. Do rotiyan dopahar ke liye, do rotiyan sham ke liye len, aur khub bhajan karen.

bhojan kabhi amrit to kabhi jahr ho sakta hai. Aapka jo samay barbad ho raha hai, jaise adhik nind, naam jap mein nirantrta ki kami – iska mukhya karan aapka ahar hi hai. Sanyam se chalie. Aaj se keval utna bhojan karen ki aapki padhai ya nokri/vyavsay/karya mein thakan na ho, pramad ki sthiti na bane, pet mein kabz na ho aur man prasann rahe. Sukhi roti aur daal khane wale ka man kamuk chintan mein nahi jaata. Halwa, puri, kachori, rasgulla khakar dekhiye, agar man kam bhavna ka chintan na karne lage, to hamen bataiega.

margdarshak: pujya shri hit Premanand Govind sharan ji maharaj

pujya shri hit Premanand Govind sharan ji maharaj brahmcharya ke liye bhojan ke niyamon par margdarshan karte hue

sambandhi video: YouTube

mul lekh: bhajanmarg.com