bure karmon ka phal bura hi hota hai: do lalchi kisanon ki kahani

do bhai the. Ve donon kisani ka kam karte the. Unki grahasti kisani ke karya se chalti thi. Unke paas do bailon ki jodiyan thin. Unhone socha ki ek bailon ki jodi se unka kam chal jaega aur ve dusri jodi kuch dhan prapt karne ke liye bech denge.

ek din bailon ke vyapariyon ko pata chala ki ganv mein do kisanon ke paas bailon ki ek bahut sundar jodi hai, jo ve bechna chahte hain. Vyapari un do kisanon ke paas aae aur unhone barah hazar rupyon mein unse bailon ki jodi khareedne ka sauda tay kiya. Un vyapariyon ke paas paizon se bhara ek thaila bhi tha. Sandhya ka samay tha, to vyapariyon ne un kisanon se ek raat unke yahan rukne ka agarh kiya. Vyapariyon ne kaha ki kal subah ham aapko barah hazar rupye denge aur bail lekar chale jaenge. Aaj raat ham aapki sharan mein hain, aap hamari aur hamare dhan ki raksha kijiye.

ab ye donon atithi bhi the aur sharanagat bhi the. Agar koi aapki sharan mein aaya hai, to chahe aapko apne prannon ki bali chadhani pare, lekin uski hani nahi honi chahiye. Sharanagat ki hani nahi honi chahiye. Agar uski hani ho gayi, to aapko narkon mein saza milegi aur yahan sarkar dwara bhi dand milega. Sharanagat ka tyag aur shoshan bahut bada paap hai.

vyapariyon ki marne aur unka dhan lutne ki sazish

un kisanon ne raat mein un vyapariyon ko accha bhojan khilaya aur ghar ke bahar baramde mein sone ko kah diya. Ab donon kisanon ne apni patniyon ke saath milkar socha ki agar in donon vyapariyon ko mar diya jae, to bail bhi nahi dene padenge, barah hazar rupye to milenge hi, aur inke thaile mein rakhe hue aur bhi paise hamen mil jaenge. Yah bhav sarvnash karne wala hai, kyonki ve donon unke sharanagat aur atithi the. Yah ek mahat paap hai aur yah tatkaal lok-parlok donon ko nasht kar deta hai. Yah paap turant prabhav dikhata hai.

unke hriday mein hatya karne ka pura vichar ban gaya. Unki patniyon ne unhen pehle lash gadne ki vyvastha karne ko kaha. Un kisanon ne kaha ki bagal mein hamara ganne ka khet hai aur ham donon vyapariyon ko marne ke baad ek hi gadhe mein gad denge. Ham un donon ke nap ka gadha khodkar abhi ate hain. Wah atisheeghra ganne ke khet mein jakar ganna katkar gadha khodne lage.

padosi ne diya dakhal

daiveey yog se unke padosi ko usi samay shauch lagi. Usne socha bagal mein hi ganne ka khet hai, yahi shauch kar leta hoon. Pehle ke samay mein shauchalay to hua nahi karte the. Log ganv ke bahar kheton mein shauch ke liye jaate the. Ab wah ganne ke khet mein gaya. Usne un donon kisanon ko bolte hue suna ki, “kya itne bade gadhe mein do shav aa jaenge?” use laga ki yah donon raat mein kya yojana bana rahe hain? Wah chori-chhupe unke nazdeek gaya. Usne unhen age bolte hue suna ki, “kahin hamse koi paap to nahi ho raha?” is par dusre ne kaha, “are, unke paas hazaron rupye hain, jo hamen asani se mil sakte hain. Tum kya paap-punya ke bare mein soch rahe ho? Ham donon ko isi gadhe mein hi gad denge. ”

us padosi ne yah sab sun liya aur wah tezi se un kisanon ke ghar ki taraf un vyapariyon ko bchane ke liye bhaga. Usne waha jakar donon ko jagaya aur unse kaha ki aap donon abhi mere saath chalo. Aur jo bhi tumhare paas paisa hai, use bhi le lo. Wah bhagwan ki prerna se unhen bchane ke liye aaya tha, to un donon ko bhi uski baton par koi sanshay nahi hua aur ve turant apna jhola lekar uske saath uske ghar chale gaye.

bure karm ka bhyawah parinaam

un kisanon ke baramde mein gadde aur rajaaai waise hi bichhe rahe. Wah padosi un donon vyapariyon ko apne ghar le gaya aur unse kaha ki in donon kisanon ne tumhen markar tumhara dhan lutne ki yojana banai hai. Unhone tumhen gadne ke liye gadha bhi khod liya hai. Aaj raat tum chup-chap yahi ruk jao.

un donon kisanon ka ek-ek beta tha. Ve donon bete us raat gaon mein nautanki dekhne gaye the. Un kisanon ne bada hi nikrisht sankalp kiya tha, isliye is paap karm se prerit hokar un ladkon ke man mein aaya ki hamen natak accha nahi lag raha, yahan se chalte hain. Ve donon masti se batchit karte hue ghar aae to unhone dekha ki baramde mein gadde aur rajaaai bichhe hue the. Unhen laga ki shayad mata-pita ne socha ho ki ham ratri mein pata nahi kab aaenge, to darwaza na khol pare, isliye unhone hamare bistar yahi bahar laga diye. Yah sochkar ve donon munh dhakkar bahar baramde mein so gaye.

ab wo donon kisan gadha khodkar wapas aae aur apni patniyon se kaha gadasa nikalo. Gaon mein bijli to thi nahi, to andhere mein hi unhone un donon soe hue apne hi beton ki hatya kar di aur unhen gaddon samet le jakar us gadhe mein gad diya. Jab wo unhen gadkar wapas aae, to unhone socha ki wo paizon se bhara thaila kaha hai, jiske liye unhone ye puri sazish rachi thi. Unhen laga ki unhone paise gaddon samet us gadhe mein gad diye, to unhone jakar wapas gadha khoda aur dekha ki ve donon shav unke hi putro ke the. Ab wo na to chilla sakte the aur na hi ro sakte the.

dusron ko dhokha dene ka dand

subah hote hi unka padosi un donon vyapariyon ko lekar unke paas aaya aur kaha ki tum to badi hi sundar yojana bana rahe the in donon ko marne aur inka lutne ki. Lekin prabhu ki kripa se yah donon bhi surakshit hain aur inka paisa bhi surakshit hai. Usne jakar pulis se unki shikayat ki aur un sabhi ko saza hui. Unke putr bhi mare gaye. Apne sharanagat ka ahit karne ka sochne matra se aapka sarvnash ho jaega. Apne sharanagat ko dhokha dene ki wajah se un donon kisanon ko dand mila aur unka pura jeevan barbad ho gaya. Yahi nahi, apne sharanagat ke saath chhal karne wale ko is sansaar mein kasht sahne ke baad narkon mein bhi saza bhogni padti hai.

margdarshak: pujya shri hit Premanand Govind sharan ji maharaj

pujya shri hit Premanand Govind sharan ji maharaj bure karmon ke parinaam par margdarshan karte hue

sambandhi video: YouTube

mul lekh: bhajanmarg.com