sahi jeevan sathi kaise khojen?

yah ek mahatwapurn prashn hai kyonki is pidhi ke bachchhe charit vikas ke mahatva ko nahi samjh pa rahe. Boyfriend, girlfriend, breakup, phir dusra boyfriend, dusri girlfriend, ye sab kya hai? Yah charit hinta hai. Yahi hai aadhunik samaj? Yadi aap apne man, indriyon aur sharir ko pradushit karenge to aap jeevan mein pragti kaise karenge? Grihasth jeevan (vivah) ka nirvah kaise karenge? Pravriti itni dushit hone ke baad aap kisi ko apne pati/patni ke rup mein kaise sweekar kar payenge?

hamne apne samay mein kabhi talak shabd suna hi nahi tha. Mata-pita apne bachchon ki shadi achhche se karate the aur nav vivahit dampati jeevan bhar ke liye ek-dusre ko apna jeevan sathi sweekar kar lete the. Aise vivahon se paida hui santanen desh ki seva kartin thi. Aur aajkal kya ho raha hai? Mata-pita se koi sambandh nahi, agar ve koi sawal puchhen to unhen apman purn jawab milta hai, aur agar ve bachchon ko dantne ki koshish karte hain to ve kahte hain ki ya to main ghar chhod ke chala jaaunga ya atmhtyaa kar lunga. Iske baad kahne ko kya rah jaata hai?

hamari nai pidhi kis disha mein ja rahi hai?

aaj ki nai pidhi bahut hi galat raah par ja rahi hai. Chhote bachchhe nasheele padartho ka sevan karne lage hain. Hamare school ke samay mein, girlfriend/boyfriend shabd the hi nahi; us samay mobile phone ka avishkar bhi nahi hua tha. Ganvon ke sidhe-sadhe bachchhe school se akar apne gharo mein khelte aur khate pite the. Jeevan pavitra tha. Aaj ke samay mein shadi ke liye koi shuddh aur dharmanishtha vyakti milna mushkil hai. Keval bhagwan swayam aapke liye aisa koi bhej sakte hain. Anytha yadi aapko aisa jeevansathi mil jaye to yah aapki tapasya, pavitra aur bhakti ka hi praman hoga. Aaj ke samay mein hamara samaj patan ki or ja raha hai.

aajkal kaun sharab nahi pita, kaun vyasan rahit hai, kaun vyabhichar rahit hai aur sanyam se chalta hai? Agar koi hai bhi to lakho mein se koi ek hi hoga jo keval apni patni ya apne pati se pyar karta hai. Aisa pati ya patni to keval bhagwan hi de sakte hain. Iska nirnay to isi se hoga ki aap kitne tapasvi hain, kitni puja karte hain aur aapne kitna punya kamaya hai.

charit ka mahatva

hame tabhi koi behtar mil sakta hai jab ham swayam achhche hon. Yadi aap naitikta ka palan nahi kar rahe hain, to aapko aisa jeevansathi nahi mil sakta. Halanki, yadi aapka aacharan satvic hai, to bhagwan ne avashya aapke liye vyvastha ki hogi. Jiska charit accha nahi hai wah kuch bhi nahi kar sakta. Char din ki chandni ke baad, andheri raat uska intzar kar rahi hai.

yadi aapka charit accha nahi hai, to aap kuch dino ke liye chamkenge aur halogen bulb ki tarah fyuz ho jayenge. Yadi aapka charit accha hai, to aap tel ke deepak ki tarah chamkenge, lekin aapki prasiddhi, sukh aur samriddhi lambe samay tak badhti rahegi. Agar ham khud mein sudhar karen to samaj sudhara ja sakta hai.

liv in rileshanship

aajkal ek aur chiz chalan mein aa gayi hai jise liv in rileshanship kaha jaata hai. Mahine-do mahine saath rahna aur phir kahna ki hamen yah insaan pasand nahi hai. Kya yahi hamare sanskar aur siddhant hain? Do sharir mil rahe hain aur phir kuch der baad kah dete hain ki nahi, hamen yah insaan pasand nahi hai. Ye kis aur badh chala hai hamara samaj? Ham patan ki disha mein ja rahe hain. Pragti ke naam par ham girte ja rahe hain. Jise dekho uske andar mein gussa, ladai-jhagda karne ki pravriti aur dosh hi nazar ate hain. Bachchhe apne mata-pita se itne rukhepan se baat karte dekhe jaate hain ki ascharya hota hai ki ye jeevan mein kya pragti karenge? Yadi aap shiksha prapt kar rahe hain to aapke andar vinamrata ani chahiye, pavitra ani chahiye; aaj ke bachchon mein yah raaksasi buddhi kaise aa rahi hai?

mera har mata-pitaon se anurodh hai ki apne bachchon ke saath mitrvat vihaar karen. Unhen yah samjhane ki koshish karen ki aap jis disha mein ja rahe hain wah galat hai. Isse jeevan purntya bekar evam nasht ho jayega. Apmen yah sab karne ke baad kya shadi ko lekar koi utsah baqi rahega? Jab aapne apni bhavanon ko ganda kar liya hai to ek mahan samaj ka nirman kaise hoga? Mera sabhi bachchon se anurodh hai ki ve savdhaan rahe. Sabhi mata-pitaon se mera anurodh hai ki kisi tarah hamare naye bachchon ke dimaag mein yah baat daalen ki brahmcharya ko nasht karna jeevan ko nasht karne ke barabar hai. Charit ko nasht karna jeevan ko nasht karna hai. Yah buniyad hai; charit na ho to mahal nahi ban sakta. Charit ke bina jeevan ka koi adhar nahi hai.

nishkarsh

apna jeevan pavitra rakhen. Brahmcharya se yaddashta majbut hoti hai aur sharir ka vikas hota hai. Grihasth jeevan ishwar prapti ka marg hai. Apne kartavyon ka palan karte hue bhagwan ka naam japen; bhagwan prasann hokar hamen is apvitra jeevan se mukt kar denge. Bhagwan ka naam chamatkar kar sakta hai, ismen sabhi dukho ke nivaran ki shakti hai. Isiliye, naam ka jap karen, aur bhagwan par bharosa rakhen; yah sansaar duhkhmay hai. Aap ise abhi tak nahi samjh paye hain aur isiliye aap sansarik sukho mein anand dhoondh rahe hain. Sahi aacharan karen, bhagwan se kshma mange aur naam ka jap karen; sare dukh mit jayenge.

margdarshak: shri hit Premanand Govind sharan maharaj ji

shri hit Premanand Govind sharan ji maharaj jeevan sathi chayan karne par margdarshan karte hue

sambandhi video: YouTube

mul lekh: bhajanmarg.com