jeevan mein kuch banna chahta hoon. Kya laukik unnati adhyatmik jeevan mein badha hai? Jeevan ka lakshya kya hai?

aap kuch kyon banna chahte hain? Sab kuch kyon nahi? Chhoti kamna kyon karen? Mangna hi hai to kuch aisa mango ki dobara mangna na pare. Yah mang sirfa prabhu se honi chahiye ki prabhu, main aapka ho jaun; aap mere priy banen. Aapke siva mera koi nahi hai. He prabhu, sansaar mein aap mujhse jaisa karvana chahte hain vaisa karate rahe, jo pad ya pratishtha dena hai, dijiye par is sab mein mera koi mahattwa nahi hai. Isliye ham keval prabhu ki taraf praytn karen aur ve hamen hamare anusaar sahi sthan par phucha denge. Agar prabhu aapko koi pad dena chahen to wah aapko uske anusaar vivek aur samarth de denge. Kintu aapka lakshya prabhu hone chahiye, aapki vishram sthal prabhu hon, koi pad ya pratishtha nahi.

haridas se badhkar koi pad hai?

use brahma ka bhi pad bahut bura lagne lagta hai jisko haridas pad ka prichay prapt ho jaata hai. Hamen shastron se sahi siddhant ka gyan hota hai. Shastron ke anusaar bhagwan ka anuragi bhakt, na to brahma ke pad ki akanksha karta hai, na Devraj indra ke pad ki, na siddhion ki aur na moksh ki. Jo prabhu ke charnon ke dastv bhav se yukt ho gaya hai, wahi sabse bade pad par hai.

sansaar dwandwa yukt hai

jab aapki buddhi thodi pavitra hogi, tab aap dekhenge ki sansaar mein kitna dukh hai. Kisi ke paas bahut achchhi bhojan ki samgri hai, lekin use bhookh nahi hai. Kisi ke paas aram se sone ki vyvastha hai, lekin nind nahi hai. Koi bahar se sukhi dikhayee dete hue andar se anek karanon se duhkhi hai. Koi chain se sone ke liye dawa le raha hai. Koi relax hone ke liye gandi filmon, gandi baton aur galat aadaton aadi ka sahara le raha hai. Bahut sundar bhog samagriyan hain, indriyan bahut pusht hain, lekin phir bhi aaj sabka man ashant hai, kleshit hai, aur kai log depression mein bhi hain. Andar se prabhu ke charnon ka sambandh rakhkar, bahar se jo bhi karya karen use prabhu ki seva mankar karen. Yah sansaar badalta rahta hai. Agar aap yah lakshya rakenge ki sansaar ka jeevan sukhmay vyatit ho, sammaan mein vyatit ho, to ye kabhi nahi ho sakta. Agar ham sansaar ko lakshya banate hain to hamen sukh-dukh, labh-hani, unnati-avnti aadi bhogna padega. Aur jo in dwandon mein phans jaata hai, use shanti nahi prapt hoti.

prabhu ko lakshya banane wala hi shanti prapt kar sakta hai

sabko sukh pahunchane ki chah karen aur uska phal mangen ki prabhu aapse prasann ho jain. Hamara vyapar, hamari nokri aur jo bhi karya hai, wah sab thakur ji ka hi hai. Puri srishti thakur ji ki hai, to hamen jo bhi seva mili hai, wah bhi prabhu ke dwara hi di gayi hai. Hamen imandari se us seva ko pura karna hai. Shri sadan kasai ji mans bechte the, phir bhi shastron mein unka varnan ek mahan bhakt ke rup mein hua hai. Wah jo bhi karte the wah prabhu ke banke karte the. Wah apni kul parampara ka vyapar kar rahe the, kintu unka lakshya prabhu the. Ve bade-bade gyanyon ko bhi updesh dene mein samarth the. Durbhagya hai ki hamara lakshya sansaar hai. Kuch log thakur ji ki seva bhi sansaar ki vastuen prapt karne ke liye hi karte hain, swayam prabhu ko nahi.

sukhmay jeevan vyatit karne ke liye aapko sukh ki asha chhodni padegi. Yah sutra samjhna kafi kathin hai. Asha agar prabhu ki hai to aapka jeevan sukhmay ho jaega. Sansaar mein adhiktar log sukhmay jeevan vyatit karne ke liye vishyon ko apna lakshya banate hain. “asha hi parmam duhkham, nairashyam parmam sukham. ” – isi wajah se sukh kahin khojne par bhi nahi mil raha.

agar aap yah nischay karenge ki kuch bhi ho mujhe prabhu chahiye, to nischit hi aapka jeevan sukhmay, shantimay aur anandmay ho jaega. Paristhiti kuch bhi ho, aapke jeevan mein anand ki kami nahi hogi. Kyonki lakshmi jinki dasi hain, un prabhu ko aapne apna Swami man liya hai. Ab sab siddhiyan aur sab grah aapke paksh mein ho jaenge. Wah aapka amangal nahi karenge. Aapka har kam mangalmay hoga. Bhakt ke aaspas Bhagwad kripa ka ghera hota hai.

tab lagi kusal na jeev kahun, sapnehun man bishram.
jab lagi bhajat na Ram kahun, sok dham taji kam ॥
arth: jab tak yah jeev shok ke ghar kam vasna ko tyagkar shri Ram ko nahi bhajta,
tab tak uske liye na to kushal hai aur na swapna mein bhi uske man ko shanti milti hai. Goswami shri tulsidas ji, dohavli

chahe jitni paristhiti bigdi ho, lekin yadi mand-mand muskurate hue thakur ji ke charnon ka aashray hai to hriday utsah aur anand se bhar jaata hai. Pyar mein ek albeli masti hoti hai. Usmen phir shikwa-shikayat sab bah jaate hain. Phir wah vyakti har samay anand-magn rahta hai.

margdarshak: pujya shri hit Premanand ji maharaj

shri hit Premanand Govind sharan ji maharaj jeevan ke lakshya par margdarshan karte hue

sambandhi video: YouTube

mul lekh: bhajanmarg.com