naam jap ke niyam aur savdhaniyan!
1. Naam jap mein jaldeebazi na karen
jab ham naam ya mantr jap kar rahe hon, to usmen jaldeebazi nahi honi chahiye. Aisa na ho ki aap naam ya mantr ko dekh hi na paen. Jab aap “Radha” ya bhagwan ka koi bhi naam ya mantr jap rahe hon—use dekhiye, har shabd, har matra ko man mein likhie. Aapko japte-japte naam aapke samne dikhna chahiye. Man mein naam ko dekhte-dekhte naam japiye. Aapko romach hone lagega, rona ane lagega.
2. Har naam ko sunen aur dekhen
dusri baat, agar naam ko sune bina hi japte rahe, to aapka man idhar-udhar bhagne lagega. Aise jap ko man sweekar nahi karta. Kuch log sochte hain ki jaldi-jaldi mala pherne ya counter par sankhya badhane se bahut kuch mil jaega. Lekin aisa “jaldi-jaldi” ka abhyaas nahi hona chahiye. Jab abhyaas pakka ho jaata hai, to chahe bahut shorgul bhi ho, to bhi ham naam jap mein tike rah sakte hain. Dhire-dhire, dekhte hue aur sunte hue naam jap ka abhyaas karne par, bahut shor hone par bhi aapko naam ya mantr aapke samne dikhne lagega. Agar kisi se baat bhi ho rahi ho, tab bhi uske mukh par wahi naam likha hua dikhega. Jidhar drishti jaegi—naam hi naam, keval naam.
3. Keval sankhya puri karne par jor na den
mala ki sankhya naye sadhako ko isliye bataai jati hai, kyonki ve aksar mahapurushon ki tarah nirantar naam jap nahi kar pate. Unka man pramadi hota hai, isliye unhen kaha jaata hai—kam se kam 11 mala ka to niyam le lo, ya 21 mala ka niyam le lo. Man ko vash mein karne ki prakriya gintin se nahi hoti. Man gintin se vash mein nahi aata. Man to bas samay kaata hai—mala puri hui, uske baad mala rakh di, aur phir sansaar ke prapanchon mein ghumne laga. Man chahega kuch aur, sochta rahega kuch aur, kisi aur disha mein bhatakta rahega. Mala chalti rahegi, teji se chalti rahegi… aur saath mein phone bhi chalta rahega. Lekin agar sahi tarike se, sunte hue aur man mein likhte hue naam japa jae, to naam mein wah shakti hai jo man ko nischit rup se vash mein kar sakti hai.
4. Jab mantr mein man na lage, to us samay naam jap karen
jis naam ka ucharan kiya jae, use man ki nigrani mein lana zaruri hai. Man ki ankhon se use dekhna, us par nazar rakhna. Agar aapki nazar zara bhi chuki, to pata bhi nahi chalega ki kitne naam nikal gaye aur man idhar-udhar bhatakta raha. Yadi aapka man nigrani nahi kar raha hai aur idhar-udhar bhtak raha hai, to aise samay mein mantr ucharan na karen, balki mukh se naam jap karen. Bol-bolkar naam jap karke man ko ghaseeten, kyonki mantr ko mukh se bola nahi ja sakta. Mantr to andar hi andar japna hota hai.
5. Vivid dhunon mein naam ko gungunana ya kirtan karna
rajoguni man vishyon ki taraf jaata hai. Jaise saamp ke jahr ko nasht karne ke liye jahr ka injection lagaya jaata hai, waise hi aap kisi dhvani ya dhun mein naam ko gakar apne man ko phansa sakte hain. Phir man naam ko chodna bhi chahega to chhod nahi payega. Agar koi dhvani aapko bahut priy lage to usmen naam ko gungunana shuru karen. Aapko pata bhi nahi chalega aur aap us dhun mein naam ko dinbhar gungunate rahenge.
6. Apne Gurudev aur aradhya dev ki chavi ko samip rakhen
apne aradhya dev ya guru ki chavi ko samip rakhkar naam japen. Agar aap koi kam kar rahe hain to usmen bhi apne prabhu ko apne saath rakhen. Jaise ki aap parikrama karne ja rahe hain, to prabhu se kahiye, chalo Priya pritam, mere saath van vihar ke liye chalo. Phir aisi bhavna karen ki prabhu aapke saath-saath chal rahe hain. Aisa bar-bar karne se ek din sach mein aapko unke nupuron ki jhankar sunai dene lagegi.
Gurudev aur aradhya dev mein koi antar nahi hai. Ham mein kami yah hai ki ham bhagwan ke shri vigrah mein to prabhu ki bhavna kar lete hain, par Gurudev ko keval ek sadharan manushya hi samjhte hain. Gurudev sakshat prabhu hi hain. Par hamara abhiman hamen unhen manushya se zyada manne nahi deta. Ham sochte hain ki yah bhi to hamare tarah hi khate-pite hain ya hamare jaise hi kapde pahnte hain. Ham jis prabhu ko prapt karna chahte hain, wahi prabhu ek aise rup mein aae hain jinki baat hamen samjh aae, ham aisi bhavna apne Gurudev mein nahi kar pate.
prabhu aur Gurudev ke rup ko bar-bar dekhkar naam jap karte rahe, isse aapka man aapke adhin ho jaega. Prabhu aapki cheshta ko dekh rahe hain ki aap bar-bar apne man ko prabhu mein lagane ki koshish kar rahe hain, to aapki sadhna se nahi, balki unki karuna aur kripa se aapka man aapke adhin ho jaega.
margdarshak: shri hit Premanand Govind sharan ji maharaj
shri hit Premanand ji maharaj naam japne ki savdhaniyon par margdarshan karte hue
sambandhi video: YouTube · YouTube
mul lekh: bhajanmarg.com
sambandhi
- jab bhi man udas ho, chinta ho ya koi pareshani aae, to yah padh lena ! — jeevan ke sangharshon mein jab mansik udasi, chinta aur ashanti ka andhkar hamen gher leta hai, tab vivek ki drishti dhundhli padne lagti hai. Shastron ne is sansaar ko ‘dukhalai’ aur ‘bhav-samudra’ kaha…
- naam jap pehle aapko harayega ! — adhikansk log shanti, samriddhi aur dukho se mukti ki khoj mein “naam jap” ka marg apnate hain. Lekin kya aapne kabhi socha hai ki bhakti ke marg par chalte hi jeevan mein pareshaniyan aur mansik…
- apne bhajan ko bchane ke liye kya jhooth bolna theek hai? — jab baat apne bhajan aur antarik shanti ko sansarik pradushan se bchane ki ho, to yah ‘jhooth’ matra ek suraksha kavach hai. Adhyatmik marg par ‘pradarshn’ sadhna ka sabse bada shatru hai. Uchh koti ke…
- man par vijay pane ke sutra — kalpna kijiye us sadhak ki, jisne varsho tak satsang suna, Gurudev ki vani ko atmasat karne ka dava kiya, lekin jab vasna ki ek lahar uthi, to sara gyan dhara ka dhara rah gaya. Sadhak…
- sadhak ka swabhav kaisa hona chahiye? — ham ghanton naam-jap karte hain, lekin jab vihaar ki baat aati hai, to wahi purana chhal-kapt aur krodh ubhar aata hai. Kya aapne kabhi socha hai ki aapki barson ki sadhna aapke ‘swabhav’ ko kyon nahi badal…
- bas yah kar lo, koi bhi gandi aadat chhut jaegi ! — aksar ham kisi gande vishay ya purani vasna ko chhorne ka dridh sankalp lete hain, lekin agle hi din khud ko usi daldal mein wapas pate hain. Ham jitni shakti use ‘chhorne’ mein lagate hain, wah utni…