lagataar asphaltaon se mera atmvishwas kam ho gaya hai aur main nirash hoon, kya karu?

aisa sambhav nahi hai ki kisi ke jeevan mein sau prateeshat asflata hi asflata ho. Jis prakaar raat evam din hote hain, usi prakaar aapke jeevan me asflata evam safalta donon ka chakra chalta hai. Yah ho sakta hai ki aapki mangen adhik hon aur un mangon ko pura karne ke liye utna punya aapke paas nahi hai, aur isiliye aapka atmvishwas tut raha hai. Jaise agar aapke paas sau rupye hon aur aap heeron ke har ki kamna karen aur na milne par bhagwan aur swayam ko kosen to kya ye sahi hai? Waise hi vartman ki safalta va asflata purv karmon ke prabhav se milti hai. Ise samjhne ke liye vivek evam gyan ki zaroorat hai!

jeevan ki sachchi safalta kya hai?

aap bol sakte hain, sun sakte hain! Bhagwan ne aapko kitna kuch diya hai, yahi sachchi safalta hai! Bhagwan karm ke anusaar sabhi ki avashyaktaon ki purti kar rahe hain. Aur jo jeevan jine ke liye atyant avashyak hai jaise hawa, jal, akash, dharti, wah sab bhi nihshulka de rahe hain. Kabhi thodi der ke liye soch ke dekhen ki jo dekh, sun ya bol nahi sakte, unka jeevan kaisa hota hoga? Aap kabhi bhagwan ko dhanyavaad dijiye ki aapko kitna sundar jeevan diya hai! Aap naam jap badhiye, tapasya badhiye, aur satkarma badhiye, uske anusaar aapko labh milega.

karmon ka khel – yahan kuch bhi mufta nahi hai!

is sansaar me kuch bhi mufta nahi hai. Agar koi rashtrapati bani hain to unhone tapasya ki hai. Agar koi arabon rupyon me khel raha hai to usne dan-punya aur tapasya ki hai. Aur agar ab wo vyakti paap kar raha hai to age uska bhi parinaam aayega aur sab nasht hoga. Lekin purv mein usne jo punya kiya hai, usi ke pratap se use vartman me dhan mil raha hai. Yahan ek paisa bhi mufta nahi hai; hamare karm ke anusaar hi hamen kuch bhi milta hai aur karm ke anusaar hi hamare hath se kuch jaata hai. Ab dekhna yah hai ki aap vartman me kya kheti kar rahe hain, jiska parinaam aapko bhavishya mein milega?

apna vartman sudharie!

vartman ki kheti achchhi karen! Utsah se sampanna rahe aur asflata ko raundte jayen! Aap shayad ek bar, do bar ya teen bar asfal honge par chauthi bar mein aapko gyan ho jaega ki aap kyon asfal ho rahe hain aur aap age nikal jaenge. Kisi ke bhi bhagya mein hamesha asfal hona nahi likha ho sakta! Ham manushya hain, pashu nahi, ki ham sirf praarabdh (purv karm) ke adhin hon. Ham naveen karm karke naveen praarabdh ki rachna karne aae hain. Hamen nirash nahi hona hai. Hamen naam jap karna hai, hamen apna charit pavitra rakhna hai, aur dusron ke adhikar ki raksha karte hue sansarik unnati ke liye pryasrat rahna hai. Aisa karne se aapko avashya safalta milegi.

karm aur kal ka chakra

vidyaranya naam ke ek bahut bade sanyasi the. Unka janm ek garib brahmin parivaar mein hua. Garib hone ke karan unke paas apne mata-pita ke poshan ke liye koi vyvastha nahi thi. Wah brahmanatwa mein sthit the aur unhone santo ka sang kiya tha. Dhan ki vyvastha ke liye unhone Gayatri ka anusthan kiya. Chaubees lakh bar Gayatri mantr ka jap karne se ek purashcharan hota hai. Unhone aise teees purashcharan kiye parantu unhen kuch hasil nahi hua. Is samay mein unke mata pita ka bhi nidhan ho gaya. Unki ayu bhi adhik ho gayi aur unhone sanyaas le liya! Jese hi unhone sanyaas liya, mata Gayatri unke samne prakt hokar bolin, tumhen jo bhi mangna ho mang lo, main tumhen kuch bhi dene ke liye tatpar hoon. Unhone kaha, ab to main sanyasi hoon, ab mujhe kuch nahi chahiye. Unhone pucha aap pehle kyon nahi ain? Tab mata Gayatri ne kaha, tumhare purv ke chaubees mahapap the. Tumhare teees paap purashcharan se aur antim paap sanyaas lene se nasht hua. Aur iske baad main turant aa gayi.

is kahani se hamen yah pata chalta hai ki jab tak hamare purv ke paap baqi hain, wo hamari unnati me badha dalte rahenge. Hamen prayas karte rahna chahiye aur saath hi saath bhagwan ke naam ka jap bhi karna chahiye. Prabhu ka jo bhi naam aapko priy ho, uska jap karen. Bhagwan ke naam mein papon ka nash karne ki samarth hai. Asflata milne par nirash na hon, ham prabhu ke ansh hain, pashu nahi!

safalta prapti ke do sadhan!

jeevan mein safalta prapt karne ke liye do sadhan hone chahiye, ek antarik naam jaap aur ek bahya prayas! Isse ham safal ho jaenge. Gita mein bhagwan ne arjun ji se yahi kaha hai, “mera smaran karte hue yuddh karo”. Yah smaran paap ka nash karega aur bahya prayas aapki unnati ka marg kholega.

charit ko pavan rakhen, dharm-purvak chale aur naam-jap karte hue apne kartavya ka palan karen. Agar aap yah sab karte hain to jeevan mein utsah-hinta kabhi aa hi nahi sakti. Aur agar purv ka paap hamen girane aaya to ham use apne bhajan ke bal se mitaenge. Papon ka nash bhajan ke bal se hi hota hai, bahari vihaar se nahi.

margdarshak: shri hit Premanand Govind sharan ji maharaj

shri hit Premanand ji maharaj asflata, atmvishwas aur nirasha par margdarshan karte hue

sambandhi video: YouTube

mul lekh: bhajanmarg.com