pratap ray ji ki kahani – bhagwan ne inhe jail mein diye darshan

pratap ray ji ek bahut bade bhakt the. Unka kul parampara se qarza dene ka vyapar tha. Log unke waha swarn abhushan aadi rakh kar paise le jaate aur baad mein byaj sahit mul dhan dekar apne abhushan wapas le jaate. Pratap ray ji nirantar naam jap aur Bhagwad aradhna mein magn rahte the. Dharm aur imandari se vyapar karne se unhen bahut dhan aur sampatti prapt hui. Wo usse santo ki seva aur bhandare aadi ayojit karte the. Unka badhta yash dekhkar log unse irshya karne lage aur milkar unke virudh yojana banane lage. Bhagwan hi logon ke hriday mein jalan utpann karke apne bhakt ki pariksha lete hain. Waha ke qazi aur teen aur logon ne milkar pratap ray ji ko nasht karne ka nischay kiya.

agle din unmein se ek vyakti unke waha qarza lene gaya. Usne pattharon se bhari ek jholi dekar kaha ki use uski beti ki shadi ke liye das hazar mudraen chahien. Pratap ray ji ne jab kuch girwi rakhne ke bare mein pucha to usne wahi jholi dikhate hue ishara kiya ki ismen swarn abhushan hain. Pratap ray us par vishwas karte hue bole “samne pare bakse mein ye jholi rakhkar dhan le jao aur byaaz sahit vapis karke wahin se jholi le jana. ” thodi der baad do aur log aae aur aise hi kankdon se bhari jholi ke badle pratap ray ji se swarn mudraen le gaye.

pratap ray ji ke virudh shadyantra

paanch din baad tino ek-ek karke vapis aaye aur byaaz sahit dhan lautane lage. Pratap ray ji ne dhan lekar unhen wahin us bakse se apni-apni jholi le jane ko kaha. Jholi mein kankar hi bhare the. Pahla aadmi chilla kar pratap ray ji par arop lagane laga “ are dekho! Yah mala pakde kaisa bhakt banne ka natak karta hai. Meri jholi se abhushan nikal kar kankar patthar bhar diye. ”log yah sunkar ashcharyachkit hone lage. Itne mein baqi donon bhi akar apni-apni jholi mein pare kankar patthar sabko dikhane lage. Waha hahkar mach gaya. Tino ki baten sunkar ab sab ko pakka ho gaya ki pratap ray ji to sach mein pakhandi hain aur sab ka vishwas un par se uth gaya.

tabhi waha ka qazi jisne milkar ye yojana banayi thi, badshah ke paas gaya aur pratap ray ko dand dilane ki baat rakhne laga. Hukma hua ki pratap ray ji ko bandi bana liya jaye aur unki sari sampatti zabta kar li jae. Pratap ray ji sampatti zabta hone ki baat jante hi apni patni se bole “thakur ji ko lekar apne mayke bhag jao. Unka bhog puja aadi nahi rukna chahiye, unko bachao. Ham to jail mein jaisa kasht aaya bhog lenge. ” pratap ray ji ki patni ne aisa hi kiya.

badshah ke sainikon ne pratap ray ji ki sari sampatti zabta kar li aur unhen bandi bankar jail mein dal diya. Kuch logon ne badshah ko bataya ki inhone apni patni aur thakur ji ko mayke bhijwa diya hai. Unke thakur ji ki murti asht dhatu ki hai aur badi mahangi hai, isliye pratap ray ne patni ko use le jane ko kah diya. Badshah ne unki patni ko mayke se thakur ji sahit bandi bana lane ka bhi adesh de diya.

pratap ray ji ko jail mein hua prabhu ka sakshatkar

sainikon ne unki patni ko bhi jail mein dal diya aur thakur ji ko (sampatti mankar) baqi saman ke saath godam mein band kar diya. Pratap ray ji apni patni ko hathakdiyon mein dekh sab samjh gaye. Wah ekant hokar bhagwan se prarthna karne lage “prabhu aaj tak na aap se kuch manga aur na hi koi shikayat ki. Par aaj aapko godam mein band kar diya gaya hai jaha ham aapko na to bhog laga sakte hain aur na hi aapki koi seva kar sakte hain. Ham aapko apne prannon se adhik pyar karte hain aur aapko ho raha ye kasht sah nahi pa rahe. Kuch upay kijiye jisse aapko bhog lagna na ruke, anytha main jivit nahi rah paunga. Agar aapke bhog ki vyvastha yahi ho jaye to chahe hamen aajeevan jail mein rakhiye, hamen koi kasht nahi. ”

bhagwan pratap ray ji ka bhav dekh bahut prasann hue ki is sthiti mein bhi ise meri chinta hai. Patni sahit bandi bana liye gaye, itna apman hua aur sari sampatti zabta ho gayi, phir bhi mere bhog ki chinta hai. Tatkaal bhagwan ne un ka samarpan dekhte hue apna sakshatkar unhen karaya (prabhu ne unhen jail mein darshan diye).

bole bihsi mahes tab gyani mudh na koi.
jehi jas Raghupath karhin jab so tas tehi chan hoi ॥
tab mahadev ji ne hanskar kaha – na koi gyani hai na murkh. Raghunath jab jisko jaisa karte hain, wah usi kshan vaisa hi ho jaata hai ॥ Ramcharitmanas

waha ka ek zameendar pratap ray ji ke samarthan mein badshah ke samne aaya aur bola “pratap ray ji ke prati koi pakhand racha gaya hai. Wo aisa kabhi kar hi nahi sakte. Un tino ki sahi se dobara jaanch honi chahiye. ” badshah ne tino ko dhamki dete hue kaha ki agar satya nahi bologe to phansi par chadha denge. Tino ne bataya ki jholi mein kankar unhone swayam rakhe the aur ye sab qazi ki hi yojana thi. Badshah ne tatkaal qazi ko dand diya aur un tino ko bandi banane ka adesh kiya. Saath hi pratap ray ji ko pure nuqsan sahit sab arth aur sampatti vapis lautayi gayi aur bade sammaan sahit unhen riha kiya gaya.

nishkarsh

bhakt ke jeevan mein bhagwan aisi vipatti ki leela apna sakshatkar karane ke liye hi rachte hain. Pratap ray ji aur unki patni donon ko jail mein hi Bhagwad sakshatkar hua. Isliye sadhak ko kitni bhi kasht bhari paristhiti aae, wo ant mein anand ka hi karan banegi.

isliye jaise pratap ray ji ne apni baat keval prabhu ke samne hi rakhi, waise hi hamen bhi sab kuch sahte hue bhagwan ke siva kisi aur se sahyog nahi mangna chahiye. Hamen kasht ki sthiti mein man ko keval bhagwan ki taraf modna chahiye na ki sansaar ki taraf. Jab art hokar anath bhav se prabhu ko pukara jaye to wo bhakt ko apna sakshatkar karane swayam ate hain.

margdarshak: shri hit Premanand Govind sharan ji maharaj

pujya shri hit Premanand ji maharaj pratap ray ji ki kahani sunate hue

sambandhi video: YouTube

mul lekh: bhajanmarg.com