॥ Shri Hit Sphut Vani ॥
shri hit Harivansh mahaprabhu · 27 pad
mahaprabhu ke phutkar 23 pad aur upasna ke 4 dohe — arth sahit.
pad 1
dwadash Chandra, kritasthal mangal,
Buddha virudh, sur-guru bank |
yaddi dasamma bhavanna bhrigu-sut,
mand su ketu janamma ke ank | |
ashtam Rahu, chaturtha divamni,
tau Harivansh karat na sank |
jo pai Krishna-charan man arpit,
tau kari hain ka navgrah rank | | 1 | |
द्वादश चन्द्र, कृतस्थल मंगल,
बुद्ध विरुद्ध, सुर-गुरु बंक।
यद्दि दसम्म भवन्न भृगू-सुत,
मंद सु केतु जनम्म के अंक।।
अष्टम राहु, चतुर्थ दिवामणि,
तौ हरिवंश करत न संक।
जो पै कृष्ण-चरण मन अर्पित,
तौ करि हैं का नवग्रह रंक।। 1 ।।pad 2
Bhanu dasamma, janamma nishapti,
mangal-Buddha shivasthal leeke |
jo guru hony dharamma-bhavanna ke,
tau bhrigunanda sumand naveeke | |
teesrau ketu samet bidhu-gras,
tau Harivansh man kram fike |
govinda chhandi bhramant dasau dis,
tau kari hain kaha navgrah neeke | | 2 | |
भानु दसम्म, जनम्म निशापति,
मंगल-बुद्ध शिवस्थल लीके।
जो गुरु होंय धरम्म-भवन्न के,
तौ भृगुनन्द सुमंद नवीके।।
तीसरौ केतु समेत बिधु-ग्रस,
तौ हरिवंश मन क्रम फीके।
गोविन्द छाँड़ि भ्रमंत दसौ दिस,
तौ करि हैं कहा नवग्रह नीके।।2।।pad 3
na janon chhin-ant kavan,
budhi ghathin prakashit |
chhuti chetan ju achet teu,
muni bhay bis-vasit | |
parasar sur indra kalap,
kamini man phandya |
pari va deh dukh-dwandwa kaun,
kram-kal nikanndya | |
ihi darhi darpi Harivansh hit,
jinav bhramhi gun-salil par |
jihi naman mangal lok tihun,
su hari-pad bhaju na vilumb kar | | 3 | |
ना जानों छिन-अंत कवन,
बुधि घटहीं प्रकाशित।
छुटि चेतन जु अचेत तेऊ,
मुनि भये बिस-वासित।।
पारासर सुर इन्द्र कलप,
कामिनी मन फंद्या।
परि व देह दुख-द्वन्द्व कौन,
क्रम-काल निकंन्द्या।।
इहि डरहि डरपि हरिवंश हित,
जिनव भ्रमहि गुण-सलिल पर।
जिहि नामन मंगल लोक तिहूँ,
सु हरि-पद भजु न विलंब कर ।।3।।pad 4
tu balak nahin bharyau sayanap,
kahe Krishna bhajat nahin neeke |
ativ sumishta tajiv surbhin-pay,
man bandhat tandull-jal fike | |
(jai shri) hit Harivansh nark gati durbhar,
yamadwaren katiyat nak chhinke |
bhav-aj kathin, munijan durlabh,
pavat kyon ju manuj tan bheeke | | 4 | |
तू बालक नहिं भरयौ सयानप,
काहे कृष्ण भजत नहिं नीके।
अतिव सुमिष्ट तजिव सुरभिन-पय,
मन बंधत तंदुल-जल फीके।।
(जै श्री) हित हरिवंश नर्क गति दुरभर,
यमद्वारें कटियत नक छिंके।
भव-अज कठिन, मुनिजन दुर्लभ,
पावत क्यों जु मनुज तन भीके ।।4।।pad 5
chakai pran ju ghat rahayn,
piy bichhurant nikajja |
sir-antar aru kal-nishi,
taraf tej ghan gajja | |
taraf tej ghan gajja lajja,
tuhi vadan na avai |
jal-vihun kari nainam bhor,
kihin bhaay batavai | |
(jai shri) hit Harivansh vichari,
baad as kaun ju bakai |
saras yah sandeh pran ghat rahe ju chakai | | 5 | |
चकई प्रान जु घट रहैं,
पिय बिछुरंत निकज्ज।
सर-अन्तर अरु काल-निशि,
तरफ तेज घन गज्ज।।
तरफ तेज घन गज्ज लज्ज,
तुहि वदन न आवै।
जल-विहून करि नैनं भोर,
किहिं भाय बतावै।।
(जै श्री) हित हरिवंश विचारि,
बाद अस कौन जु बकई।
सारस यह सन्देह प्राण घट रहै जु चकई ।।5।।pad 6
saras sir bichhurant kau,
jo pal sahay sharir |
agin anang ju tiy bhakhai,
tau janai par-peer | |
tau jane par-peer dheer,
dhari sakhi bajra tan |
marat sarashin foot puni na,
parchau ju lahat man | |
( jai shri) hit Harivansh vichari,
prem virha binu wa ras |
nikat kant nit rahat maram,
kah janai saras | | 6 | |
सारस सर बिछुरंत कौ,
जो पल सहय शरीर।
अगिन अनंग जु तिय भखै,
तौ जानै पर-पीर।।
तौ जाने पर-पीर धीर,
धरि सकहि बज्र तन।
मरत सारसहिं फूट पुनि न,
परचौ जु लहत मन।।
( जै श्री) हित हरिवंश विचारि,
प्रेम विरहा बिनु वा रस।
निकट कंत नित रहत मरम,
कह जानै सारस ।।6।।pad 7
tain bhajan krit jatit Vimal,
chandan krit indhan |
amrit puri tihi madhya karat,
sarshap-khal rindhan | |
adhdut dhar par karat kasht,
kanchan-hal vahat |
bar karat panvar mand,
bovan vish chahat | |
(jai shri ) hit Harivansh vicharikai,
manuj-deh guru-charan gahi |
sakhi tau sab parpanch taji,
Krishna-Krishna-govinda kahi | | 7 | |
तैं भाजन कृत जटित विमल,
चन्दन कृत इन्धन।
अमृत पूरि तिहि मध्य करत,
सर्षप-खल रिन्धन।।
अध्दुत धर पर करत कष्ट,
कंचन-हल वाहत।
बार करत पाँवार मन्द,
बोवन विष चाहत।।
(जै श्री ) हित हरिवंश विचारिकै,
मनुज-देह गुरु-चरण गहि।
सकहि तौ सब परपंच तजि,
कृष्ण-कृष्ण-गोविन्द कहि ।।7।।pad 8
tatai bhaiya meri sau Krishna-gun sanchu |
kutsit vad vikarhin pardhan,
sunu Sikh mand partiy banchu |
manigan-punj brajapti chhandat,
” hit Harivansh ” kar gahi kanchu | |
paye jaan jagat mein sab jan,
kapti kutila kalijug-tanchu |
ihi-parlok sakal sukh pavat,
meri sau Krishna gun sanchu | | 8 | |
तातै भैया मेरी सौ कृष्ण-गुण सन्चु।
कुत्सित वाद विकारहिं परधन,
सुनु सिख मंद परतिय बंचु ।
मनिगण-पुंज ब्रजपति छाँड़त,
” हित हरिवंश ” कर गहि कंचु।।
पाये जान जगत में सब जन,
कपटी कुटिल कलिजुग-टंचु।
इहि-परलोक सकल सुख पावत,
मेरी सौ कृष्ण गुण संचु ।।8।।pad 9
manush kau tan pai bhajau brajnath kaun |
darbi lekaun mudh jaravat hath kaun | |
(jai shri) hit Harivansh prapanch, vishay-ras moh ke |
(hari haan) binu kanchan kyo chale pacheesa lohke | | 9 | |
मानुष कौ तन पाइ भजौ ब्रजनाथ कौं ।
दर्बी लेकौं मूढ़ जरावत हाथ कौं।।
(जै श्री) हित हरिवंश प्रपंच, विषय-रस मोह के।
(हरि हां) बिनु कंचन क्यो चलें पचीसा लोहके ।।9।।pad 10
tu rati-rang bhari dekhiyat hai ri Radhe,
rahsi rami mohan saunv rainn |
gati ati shithil, pragat palte pat,
gaur ang par rajat ain | |
jalaj kapol, lalit latkat lat,
bhrikuti kutila jyo dhanush dhrit main |
sundari rahav kanhav kanchuki kat,
kanak kalash kuch bich nakh dain | |
adhar-bimb-dalamlit arasyut,
aru annad suchat sakhi nain |
(jai shri ) hit Harivansh durat nahin nagri,
nagar madhup mathit sukh sain | | 10 | |
तू रति-रंग भरी देखियत है री राधे,
रहसि रमी मोहन सौंव रैंन।
गति अति शिथिल, प्रगट पलटे पट,
गौर अंग पर राजत ऐन।।
जलज कपोल, ललित लटकत लट,
भृकुटि कुटिल ज्यो धनुष धृत मैन।
सुन्दरि रहव कँहव कंचुकि कत,
कनक कलश कुच बिच नख दैन।।
अधर-बिंब-दलमलित आरसयुत,
अरु आंनद सूचत सखि नैन।
(जै श्री ) हित हरिवंश दुरत नहिं नागरि,
नागर मधुप मथित सुख सैन ।।10।।pad 11
annad aaju nand ke dwaar |
das anannya bhajan-ras karan,
prgate lal manohar gwaar | |
chandan sakal dhenu tan mandit kusum dam ranjit agar |
puran Kumbh bane toran par beech ruchir peepar ki dar | |
yuvti-yooth mili gop virajat,bajat panav mridanga sutar |
(jai shri ) hit Harivansh ajir van veethinu,
dadhi madhi doodh harad ke khaar | | 11 | |
आंनद आजु नंद के द्वार।
दास अनन्य भजन-रस कारन,
प्रगटे लाल मनोहर ग्वार।।
चंदन सकल धेनु तन मंडित कुसुम दाम रंजित आगार।
पूरन कुंभ बने तोरन पर बीच रुचिर पीपर की डार।।
युवति-यूथ मिलि गोप विराजत,बाजत पणव मृदङ्ग सुतार।
(जै श्री ) हित हरिवंश अजिर वन वीथिनु,
दधि मधि दूध हरद के खार ।।11।।pad 12
mohan lal ke rang ranchi |
mere khyal parau jini koi, baat dasau disi manchi | |
kant anant karau jo koi, baat kahou suni sanchi | |
yah jiy jahu bhalai sir upar honv pragat hvai nanchi | |
jagat shayan rahat ur upar mani kanchan jyon panchi | |
(jai shri ) hit Harivansh darau kake dar haun nahin mati kanchi | | 12 | |
मोहन लाल के रंग राँची।
मेरे ख्याल परौ जिनि कोऊ, बात दसौ दिसि मांची।।
कंत अनन्त करौ जो कोऊ, बात कहौ सुनि सांची।।
यह जिय जाहु भलै सिर ऊपर होंव प्रगट ह्वै नाँची।।
जागत शयन रहत उर ऊपर मणि कंचन ज्यों पांची।।
(जै श्री ) हित हरिवंश डरौ काके डर हौं नाहिन मति काँची।।12।।pad 13
main ju mohan sunyau venu gopal kau |
vyom muni yani sur nari vithkit bhai,
kahat nahi banat kachu bhed yati taal kau | |
sravan kundal chhurit rurat kuntal lalit,
ruchir kasturi-chandan-tilak bhaal kau |
chand gati mand bhai nirakhi chabi kam gayi,
dekhi “Harivansh hit ” vesh nandalal kau | | 13 | |
मैं जु मोहन सुन्यौ वेणु गोपाल कौ।
व्योम मुनि यानि सुर नारि विथकित भई,
कहत नहि बनत कछु भेद यति ताल कौ।।
स्रवन कुंडल छुरित रूरत कुंतल ललित,
रुचिर कस्तूरि-चंदन-तिलक भाल कौ।
चंद गति मंद भई निरखि छबि काम गई,
देखि “हरिवंश हित ” वेष नन्दलाल कौ ।।13।।pad 14
aaj tu gwal,gopal sau kheli ri |
chhandi ati man van chapal chali Bhamini,
taru tamal sau arujh kanak ki beli ri | |
subhat sundar lalan tap parbal daman,
toob lalna rasik kam ki keli ri |
venu kanan kunit shravan sundri sunat,
mukti sam sakal sukh pai pag peli ri | |
virah vyakul nath gaan gun yuvti tav,
nirakhi mukh kam kau kadan avheli ri |
sunat ” Harivansh hit ” milat radharwan,
kanth bhuj meli sukh-sindhu mein jheli ri | | 14 | |
आज तू ग्वाल,गोपाल सौ खेलि री।
छाँड़ि अति मान वन चपल चलि भामिनी,
तरु तमाल सौ अरुझ कनक की बेलि री।।
सुभट सुन्दर ललन ताप परबल दमन,
तूब ललना रसिक काम की केलि री।
वेणु कानन कुनित श्रवन सुंदरि सुनत,
मुक्ति सम सकल सुख पाइ पग पेलि री।।
विरह व्याकुल नाथ गान गुन युवति तव,
निरखि मुख काम कौ कदन अवहेलि री।
सुनत ” हरिवंश हित ” मिलत राधारवन,
कंठ भुज मेलि सुख-सिंधु में झेलि री ।।14।।pad 15
vrashbhan nandini rajat hai |
surat-rang-ras bhari Bhamini,
sakal nari sir gajat hai | |
it-ut chalat,parat dou pag,
mad gayand gati lajat hain |
adhar nirang rang gandan par,
katak kam kau sajat hai | |
ur par latki rahi lat kari,
kativ kinkini bajat hain |
(jai shri ) “hit Harivansh ” palti pritam pat,
juvti jugti sab chhajat hain | | 15 | |
व्रषभान नन्दिनी राजत है।
सुरत-रंग-रस भरी भामिनी,
सकल नारि सिर गाजत है।।
इत-उत चलत,परत दोऊ पग,
मद गयंद गति लाजत हैं।
अधर निरंग रंग गंडन पर,
कटक काम कौ साजत है।।
उर पर लटकि रही लट कारी,
कटिव किंकिनी बाजत हैं।
(जै श्री ) “हित हरिवंश ” पलटि प्रीतम पट,
जुवति जुगति सब छाजत हैं ।।15।।pad 16
chalau vrashbhan gop ke dwaar |
janam liyau mohan hit syama,
annad- nidhi sukumar | |
gavat juvti mudit mili mangal uchh madhur dhuni dhar |
vivid kusum komal kislay dal sobhit-bandanbar | |
vidit ved vidhi vihit vipravar kari swastinu uchchar |
mridul mridanga muraj bheri daph divi dundubhi ravkar | |
magadh sut vandi charan jas kahat pukari-pukari |
hatak heer cheer patambar det samhari-samhari | |
chandan sakal dhenu tan mandit chale ju gwaar singari |
(jai shri )”hit Harivansh ” dugdh dadhi chhirkat madhya haridra gari | | 16 | |
चलौ व्रषभान गोप के द्वार।
जनम लियौ मोहन हित स्यामा,
आंनद- निधि सुकुमार।।
गावत जुवति मुदित मिलि मंगल उच्च मधुर धुनि धार।
विविध कुसुम कोमल किसलय दल सोभित-बंदनबार।।
विदित वेद विधि विहित विप्रवर करि स्वस्तिनु उच्चार।
मृदुल मृदङ्ग मुरज भेरी डफ दिवि दुंदुभि रवकार।।
मागध सूत वंदी चारन जस कहत पुकारि-पुकारि।
हाटक हीर चीर पटाम्बर देत सम्हारि-सम्हारि।।
चंदन सकल धेनु तन मंडित चले जु ग्वार सिंगारि।
(जै श्री )”हित हरिवंश ” दुग्ध दधि छिरकत मध्य हरिद्रा गारि ।।16।।pad 17
taraui dhyan Radhika pyari govarddhan dhar lalhi |
kanak lata-si kyon na virajat arujhi Shyam tamalhi | |
Gauri gaan su tan taal gahi rijhwat kyon na gupalhi |
yah jovan kanchan tan gwalin safal hot ihi kalhi | |
mere kahe bilamb na kari sakhi bhuri bhag ati bhalhi |
(jai shri )”hit Harivansh” uchit hau chahat Shyam kanth ki malhi | | 17 | |
तरौई ध्यान राधिका प्यारी गोवर्द्धन धर लालहि।
कनक लता-सी क्योँ न विराजत अरुझी श्याम तमालहि।।
गौरी गान सु तान ताल गहि रिझवत क्यों न गुपालहि।
यह जोवन कंचन तन ग्वालिन सफल होत इहि कालहि।।
मेरे कहे बिलंब न करि सखि भूरि भाग अति भालहि।
(जै श्री )”हित हरिवंश” उचित हौ चाहत श्याम कंठ की मालहि।।17।।pad 18
aarti Madan- gopal ki keejiyai |
dev rishi vyas shuk das kahat nij,
kyon na binu kasht ras sindhu kau peejiyai | |
agar kari dhoop kunkum malay ranjit,
nav vartika ghrit sau puri rakhon | |
kusum krit mal nandlal ke bhaal par,
tilak kari pragat yas kyon na bhakho | |
bhog prabhu yog bhari thaar dhari Krishna pai,
mudit bhuj dand var chanvar dharau | |
achman pan hit milit karpur jal,
subhag mukh vas, kul tap jarau | |
shankh dundubhi panav ghanta kal venu rav,
jhallari sahit sur sapt nachau | |
manuj tan pai yah daay Brajraj bhaj,
sukhad Harivansh prabhu kyon na yanchau | | 18 | |
आरती मदन- गोपाल की कीजियै।
देव रिषि व्यास शुक दास कहत निज,
क्यों न बिनु कष्ट रस सिंधु कौ पीजियै।।
अगर करि धूप कुंकुम मलय रंजित,
नव वर्तिका घृत सौ पूरि राखों।।
कुसुम कृत माल नँदलाल के भाल पर,
तिलक करि प्रगट यस क्यों न भाखो।।
भोग प्रभु योग भरि थार धरि कृष्ण पै,
मुदित भुज दंड वर चँवर ढारौ।।
आचमन पान हित मिलित कर्पूर जल,
सुभग मुख वास, कुल ताप जारौ।।
शंख दुंदुभि पणव घन्ट कल वेणु रव,
झल्लरी सहित सुर सप्त नाचौ।।
मनुज तन पाइ यह दाय ब्रजराज भज,
सुखद हरिवंश प्रभु क्यों न यांचौ।।18।।pad 19
arti keejai Shyam-sundar ki |
nand ke nandan Radhika-var ki | |
bhakti kari deep prem kar bati |
sadhu sangati kari anudin rati | |
aarti braj juvti jooth man bhavai |
Shyam leela(shri) “Harivansh hit ” gavai | | 19 | |
आरति कीजै श्याम-सुन्दर की।
नंद के नन्दन राधिका-वर की।।
भक्ति करि दीप प्रेम कर बाती।
साधु संगति करि अनुदिन राती।।
आरती ब्रज जुवति जूथ मन भावै।
श्याम लीला(श्री) “हरिवंश हित ” गावै ।।19।।pad 20
rahau koi kahu manhi diye |
mere prannath Shri shyama, sapath karau trin chhiye | |
je avatar kadamb bhajat hai dhari dridh vrat ju hiye |
teu umgi tajat marjada ban bihar ras piye | |
khoye ratan phirat je ghar-ghar kaun kaj aise jiye |
(jai shri) hit Harivansh anat sachu nahi binu ya rajhi liye | | 20 | |
रहौ कोऊ काहू मनहि दिये।
मेरे प्राणनाथ श्रीश्यामा, सपथ करौ तृण छिये।।
जे अवतार कदंब भजत है धरि दृढ़ व्रत जु हिये।
तेऊ उमगि तजत मर्जादा बन बिहार रस पिये।।
खोये रतन फिरत जे घर-घर कौन काज ऐसे जिये।
(जै श्री) हित हरिवंश अनत सचु नाही बिनु या रजहि लिये ।।20।।pad 21
hari rasna Radha-Radha rat |
ati adhin atur yaddapi piy, kahiyat hai nagar nat | |
sambhram drum, parirambhan kunjan, dhudhant kalindi tat |
bilpat,hansat,visheedat,swedat satu seenchat ansuan vanseevat | |
angrag paridhan basan lagat tate ju pit-pat |
(jai shri) “hit Harivansh ” prasansat shyama dai pyari kanchan ghat | | 21 | |
हरि रसना राधा-राधा रट।
अति अधीन आतुर यद्दपि पिय, कहियत है नागर नट।।
संभ्रम द्रुम, परिरंभन कुंजन, ढूढंत कालिंदी तट।
बिलपत,हंसत,विषीदत,स्वेदत सतु सींचत अंसुअन वंसीवट।।
अंगराग परिधान बसन लागत ताते जु पीत-पट।
(जै श्री) “हित हरिवंश ” प्रसंसत श्यामा दै प्यारी कंचन घट ।।21।।pad 22
lal ki rup madhuri nainni nirakhi neku sakhi |
mansij man haran-has, sanvro sukumar rasi,
nakhsikh ang-angni umangi saubhag seenv nakhi | |
rangamgi sir surang paag latki rahi vam bhag,
champakli kutila alak beech-bich rakhi |
ayat drig arun lol kundal mandit kapol,
adhar dasan deepti ki chavi kyon hoon na jat lakhi | |
abhyad bhuj dand mul peen ans sanukul,
kanak nikash lasi dukul damini dharkhi |
ur par mandar har mukta lar var sudhar,
matt durad gati tiyni ki deh dasa karkhi | |
mukulit vay nav kishor,vachan rachan chit ke chor,
madhu ritu pik sav noot manjri chakhi | |
(jai shri) natwat “Harivansh “gaan, ragini kalyan tan,
sapt swaran kal,ite par murlika barkhi | | 22 | |
लाल की रूप माधुरी नैननि निरखि नेकु सखी।
मनसिज मन हरन-हास, साँवरो सुकुमार रासि,
नखसिख अंग-अंगनि उमंगि सौभग सींव नखी।।
रँगमगी सिर सुरँग पाग लटकि रही वाम भाग,
चंपकली कुटिल अलक बीच-बिच रखी।
आयत दृग अरुण लोल कुंडल मंडित कपोल,
अधर दसन दीपति की छवि क्यों हूँ न जात लखी।।
अभयद भुज दंड मूल पीन अंस सानुकूल,
कनक निकष लसि दुकूल दामिनी धरखी।
उर पर मंदार हार मुक्ता लर वर सुढार,
मत्त दुरद गति तियनि की देह दसा करखी।।
मुकुलित वय नव किसोर,वचन रचन चित के चोर,
मधु रितु पिक साव नूत मंजरी चखी।।
(जै श्री) नटवत “हरिवंश “गान, रागिनी कल्यान तान,
सप्त स्वरन कल,इते पर मुरलिका बरखी ।।22।।pad 23
dou jan bheenjat atke batan |
saghan kunj ke dwrae thade ambar lapte gatan | |
Lalita lalit rup ras bheenji bund bachavat patan | |
(jai shri )”hit Harivansh ” paraspat pritam milwat rati ras-ghatan | | 23 | |
दोऊ जन भींजत अटके बातन।
सघन कुंज के द्वारे ठाड़े अम्बर लपटे गातन।।
ललिता ललित रूप रस भींजी बूंद बचावत पातन।।
(जै श्री )”हित हरिवंश ” परस्पर प्रीतम मिलवत रति रस-घातन।।23।।pad 24
sabson hit nishkam mat,shri Vrindavan vishram |
shri Radhavallabh lal kau,hriday dhyan mukh naam | | 1 | |
सबसों हित निष्काम मत,श्री वृन्दावन विश्राम।
श्री राधावल्लभ लाल कौ,ह्रदय ध्यान मुख नाम।।1।।pad 25
tanhi rakh satsang mai,manhi prem ras bhev |
sukh chahat Harivansh hit ,shri Krishna kalptar sev | | 2 | |
तनहि राख सत्संग मै,मनहि प्रेम रस भेव।
सुख चाहत हरिवंश हित ,श्री कृष्ण कल्पतरु सेव।।2।।pad 26
nikas kunj thade bhay,bhuja paraspat ansh |
shri Radhavallabh mukh kamal,nirakh nain Harivansh | | 3 | |
निकस कुञ्ज ठाड़े भये,भुजा परस्पर अंश।
श्री राधावल्लभ मुख कमल,निरख नैन हरिवंश।।3।।pad 27
rasna katau jo anarto, nirikh anphuto nain |
shravan phutau jo ansuno, bin Radha yash bain | |
रसना कटौ जो अनरटो, निरिख अनफुटो नैन।
श्रवण फुटौ जो अनसुनो, बिन राधा यश बैन।।